Адзін з актывістаў ініцыятыўнай групы берасьцейцаў, якія змагаюцца супраць будаўніцтва акумулятарнага заводу, Дзьмітрый Бекалюк пасьля абеду 7 красавіка пайшоў у РАУС па пазове, а пазьней паведаміў, што затрыманы.
Пра гэта паведаміў праваабаронца Раман Кісьляк, які пакуль ня мае інфармацыі за што затрымалі Бекалюка, але ня выключае, што і за сёньняшнюю акцыю. Верагодна, 8 красавіка Дзьмітрыя Бекалюка будуць судзіць, мяркуе праваабаронца.
Дзьмітрыя Бекалюка выклікалі ў пастарунак у якасьці сьведкі па справе яшчэ адной актывісткі, Тацьцяны Фесікавай, якую вінавацяць у раздачы жоўтых балёнікаў на плошчы Берасьця 31 сакавіка.
Сама акцыя праціўнікаў акумулятарнага заводу ў Беларусі 7 красавіка прайшла бяз затрыманьняў, больш за 300 чалавек прайшлі шэсьцем у цэнтры Берасьця.
На мінулым тыдні ў Берасьці быў затрыманы адзін з актывістаў ініцыятыўнай групы Майсей Мазько, у аўтамабілі якога міліцыянты знайшлі патроны і рэчыва, падобнае да выбухоўкі. На яго завялі крымінальную справу.
У ноч на 6 красавіка Майсея Мазько вызвалілі, хаця крымінальную справу ня спынілі. Затрыманы таксама ягоны сын Дзяніс.
5 красавіка міліцыянты спрабавалі затрымаць яшчэ адну праціўніцу акумулятарнага заводу Тацьцяну Фесікаву. Дзясяткі людзей тады сабраліся каля яе дому. У выніку Тацяна трапіла ў лякарню, а не ў пастарунак.
Пратэсты супраць акумулятарнага заводу ў Берасьці. Што важна ведаць
- Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
- Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
- Штонядзелі пратэстоўцы выходзілі на цэнтральную плошчу ў Берасьці. Блогераў і актывістаў затрымлівалі, выносілі ім папярэджаньні, штрафавалі і абавязвалі выбачыцца за відэа пра акумулятарны завод.
- Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
- У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
- У верасьні 2018 году на будоўлі заводу выявілі парушэньні пажарнай бясьпекі.
- У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
- 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
- У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
- 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
- 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
- 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.
