Сёньня, 25 студзеня, першая група мігрантаў, якія папрасілі палітычнага прытулку пасьля перасячэньня мэксыканска-амэрыканскай мяжы, будзе вернутая ўладамі ЗША ў Мэксыку. Там мігранты будуць чакаць разгляду іх прашэньняў іміграцыйнымі ўладамі.
Працэдура разгляду прашэньняў аб прытулку зьмененая празь месяц пасьля таго, як міністарка ўнутранай бясьпекі ЗША Кірстэн Нілсэн абвясьціла: мігрантаў будуць адпраўляць назад у Мэксыку, пакуль заявы будуць разглядацца ў Злучаных Штатах.
«Мы апавясьцілі мэксыканскі ўрад аб нашых намерах. У адказ Мэксыка прыняла незалежнае рашэньне аб тым, што яны абавязваюцца прыняць неабходныя меры на сваім баку мяжы», — заявіла Нілсэн.
Новая палітыка накіраваная на барацьбу з штораз большай колькасьцю мігрантаў з Цэнтральнай Амэрыкі, многія зь якіх, атрымаўшы адмову ў наданьні прытулку, заставаліся на тэрыторыі ЗША нелегальна.
ЗША і Мэксыка дасягнулі ў лістападзе пагадненьня, згодна зь якім мігранты, якія яшчэ не перасеклі паўднёвую мяжу, застаюцца ў Мэксыцы, пакуль іх запыты аб наданьні прытулку разглядаюцца амэрыканскімі ўладамі. У мінулым Мэксыка адмаўлялася прымаць мігрантаў, за выключэньнем мэксыканцаў, высланых са Злучаных Штатаў.
Адміністрацыя Дональда Трампа і, у прыватнасьці, Міністэрства ўнутранай бясьпекі крытыкаваліся пасьля таго, як Белы дом абвясьціў пра зьмены ў іміграцыйнай палітыцы. Адно з новаўвядзеньняў — забарона на падачу заяваў аб наданьні прытулку для тых, хто знаходзіўся ў ЗША нелегальна, іншае — патрабаваньне падаваць запыты на прытулак з тэрыторыі Мэксыкі, да перасячэньня мяжы ЗША, і чакаць там адказу. Абодва рашэньні ўладаў цяпер аспрэчваюцца праваабаронцамі ў судах.
