Радыё Свабода сабрала 20 спосабаў, як стаць занятым у беларускай эканоміцы, патраціўшы ня больш як 30 рублёў.
Спойлер: фактычна займацца адпаведнай дзейнасьцю не абавязкова. Галоўнае — сплачваць неабходныя зборы ці адзіны падатак.
Варыянт 1. Стаць рамесьнікам за 26,97 рубля на год
Савет Міністраў лічыць рамесьнікаў занятымі ў беларускай эканоміцы.
Каб аформіць рамесную дзейнасьць, трэба прыйсьці з пашпартам у падатковую па месцы рэгістрацыі і паразмаўляць з інспэктарам.
Праца рамесьнікаў рэгулюецца ўказам № 364 і прадугледжвае выраб неядомых рэчаў. За выраб ядомых прадуктаў трэба плаціць адзіны падатак.
26,97 рубля на год. Заяву на афармленьне рамеснай дзейнасьці прымуць бясплатна, але трэба сплаціць збор – 1 базавую велічыню (24,5 рубля). У падатковай трэба набыць «Кнігу ўліку праверак», яна каштуе 2,47 рубля.
Перавагі
Плаціць за ліквідацыю рамесьніцкай дзейнасьці ня трэба.
Недахопы
- Рамесьнікам нельга выкарыстоўваць у сваіх прадуктах каштоўныя камяні і мэталы, зубы ўсіх жывёлаў, біўні ці клыкі слана, бэгемота і іншых.
- Рэклямаваць прадукцыю ў сацыяльных сетках нельга. Прадаваць тавар можна праз уласны сайт, выставы ці на кірмашах.
Варыянт 2. Плаціць адзіны падатак да 30 рублёў на месяц
Тыя, хто сплаціў адзіны падатак, — не «дармаеды». Гэта тычыцца як фізычных асоб, так і прадпрымальнікаў, сказана ў пастанове Савету міністраў.
Каб перайсьці на адзіны падатак, трэба зьвярнуцца ў падатковую інспэкцыю. Сплата адзінага падатку адбываецца да пачатку ажыцьцяўленьня дзейнасьці.
Нюансы:
- Плаціць адзіны падатак трэба толькі за месяцы, калі названая падатковай дзейнасьць ажыцьцяўлялася. Але пастанова Саўміну не вызначае, колькі разоў на год трэба сплачваць адзіны падатак, каб удзельнічаць у эканоміцы.
- Стаўкі адзінага падатку пэрыядычна павялічваюцца.
Традыцыйна найвышэйшыя стаўкі адзінага падатку — у Менску. Тут і ніжэй — штомесячныя стаўкі адзінага падатку, якія дзейнічаюць у сталіцы ад 17 лістапада:
- Пілаваньне і колка дроваў — 5 рублёў.
- Пагрузка і разгрузка грузаў — 5 рублёў.
- Аказаньне паслугаў з дапамогай аўтаматаў для вымярэньня росту і вагі — 11 рублёў.
- Догляд, утрыманьне і дрэсіроўка хатніх жывёлаў (акрамя сельскагаспадарчых) — 11 рублёў.
- Рэалізацыя хлебабулачных і кандытарскіх вырабаў, гатовай кулінарнай прадукцыі — 16 рублёў.
- Догляд за дарослымі і дзецьмі — 22 рублі.
- Праньне і прасаваньне рэчаў — 22 рублі.
- Закупляньне прадуктаў — 22 рублі.
- Мыцьцё посуду — 22 рублі.
- Гатаваньне ежы — 22 рублі.
- Дапамога па сплочваньні паслуг ЖКГ — 22 рублі.
- Касьба травы — 22 рублі.
- Прыборка тэрыторыі — 22 рублі.
- Спальваньне сьмецьця — 22 рублі.
- Вырошчваньне сельскагаспадарчай прадукцыі — 28 рублёў.
- Драбненьне зерня — 28 рублёў.
- Выпас жывёлы — 28 рублёў.
- Наладка музычных інструмэнтаў — 25 рублёў.
- Рэпэтытарства — 30 рублёў.
Галоўнае пра «дармаедзкі» дэкрэт
Дэкрэт «Аб садзейнічаньні занятасьці насельніцтва», падпісаны Аляксандрам Лукашэнкам у студзені 2018 году, абавязаў усіх «не занятых у эканоміцы» грамадзян Беларусі ў поўным аб’ёме плаціць за датаваныя дзяржавай паслугі ЖКГ, пачынаючы з 2019 году.
7 пытаньняў і адказаў пра новы «дармаедзкі» дэкрэт
Пазьней 10 сьнежня Лукашэнка пазбавіў семʼі, дзе ўсе працаздольныя — «дармаеды», права на атрыманьне дзяржпадтрымкі пры будаўніцтве жытла.
- У «базу дармаедаў» занесьлі каля 425 тысяч чалавек. У іх лік трапілі, напрыклад, грамадзяне, якія сплацілі падаходны падатак, а таксама частка тых, хто стала пражывае за мяжой.
- Каб давесьці ўладам памылковасьць занясеньня ў базу, неабходна зрабіць шэраг бюракратычных захадаў.
Імаверна, пастанову Саўміну аб «дармаедах» ад 31 сакавіка прынялі задняй датай. Вядома, што 4 красавіка гэтай пастановы яшчэ не было.
Папярэдні «дармаедзкі» дэкрэт перапісалі
Першы дакумэнт аб «дармаедах» — дэкрэт № 3 ад 2015 году — абавязваў грамадзян, якія пастаянна пражываюць у Беларусі і ня ўдзельнічалі ў фінансаваньні дзяржаўных выдаткаў або ўдзельнічалі менш за паўгода, сплачваць збор памерам 20 базавых велічыняў. Інакш ім пагражаў штраф або адміністрацыйны арышт.
У 2017 годзе збор сплацілі больш за 54 тысячы чалавек з 470 тысяч, якім былі разасланыя паведамленьні, казалі ў Міністэрстве падаткаў і збораў.
Дзеяньне дэкрэту прыпынілі пасьля пратэстных «Маршаў недармаедаў», якія праходзілі ў гарадах Беларусі ўвесну 2017 году.
