Прэм’ер-міністар Брытаніі Тэрэза Мэй прыбыла ў Брусэль, дзе правядзе перамовы з вышэйшымі службовымі асобамі Эўразьвязу, перш чым кіраўнікі ўсіх 28 краін, якія ўваходзяць у блёк, зьбяруцца для ўхваленьня пагадненьня ў нядзелю. Адначасова Мэй выступіла з адкрытым зваротам да брытанскага народу.
У суботу старшыня Эўразьвязу Дональд Туск рэкамэндаваў ЭЗ ухваліць угоду па Брэксыце ў гэтую нядзелю на пазачарговым саміце ў Бруселі.
Заява прагучала пасьля таго, як прэмʼер-міністар Гішпаніі Пэдра Санчэс атрымаў запэўненьні ад ураду Вялікай Брытаніі з нагоды Гібралтара і адмовіўся ад сваёй пагрозы байкатаваць саміт, паведамляе ВВС.
Па словах Санчэса, ён атрымаў неабходныя пісьмовыя гарантыі адносна ролі Гішпаніі ў будучыні Гібральтара — заморскай тэрыторыі Вялікабрытаніі, дзе пражывае 30 тысяч чалавек. На рэфэрэндуме аб выхадзе Брытаніі з ЭЗ у 2016 годзе 96% жыхароў Гібралтара, што прынялі ўдзел у галасаваньні, выступілі за тое, каб заставацца ў Зьвязе.
У нядзелю Мэй зьвярнулася з адкрытым лістом да нацыі з просьбай падтрымаць пагадненьне па «брэксыту», якое, па яе словах, адкрые новую старонку ў жыцьці краіны.
У нядзелю лідэры краін ЭЗ зьбяруцца на спэцыяльны саміт па «брэксыту». Яны павінны ўхваліць альбо адхіліць два ключавых дакумэнты:
— Палітычную дэклярацыю, у якой гаворыцца аб асноўных парамэтрах магчымых будучых адносін паміж Вялікай Брытаніяй і ЭЗ пасьля Брэксыту.
—Пагадненьне аб выхадзе Вялікай Брытаніі са складу ЭЗ. Гэта дакумэнт на 585 старонках, які носіць абавязковы для выкананьня характар і вызначае ўмовы выхаду Брытаніі з ЭЗ.
Выхад Вялікай Брытаніі са складу ЭЗ, за які на рэфэрэндуме прагаласавала 51,9% грамадзян краіны, заплянаваны на 29 сакавіка 2019 года. Умовы выхаду абмяркоўваюцца Брытаніяй і Эўразьвязам з чэрвеня 2016 года.
