Дзяржаўны дэпартамэнт ЗША ўхваліў угоду аб продажы Ўкраіне авіяцыйных боепрыпасаў павялічанай далёкасьці ERAM (Extended Range Attack Munition) і спадарожнага абсталяваньня на суму каля 825 мільёнаў даляраў.
Пра гэта паведаміла Агенцтва супрацы ў абароне (DSCA), якое ўваходзіць у структуру Пэнтагону.
«Прапанаваны продаж будзе спрыяць дасягненьню мэтаў замежнай палітыкі і нацыянальнай бясьпекі Злучаных Штатаў шляхам павышэньня бясьпекі краіны-партнэра — рухальнай сілы палітычнай стабільнасьці і эканамічнага прагрэсу ў Эўропе», — гаворыцца ў паведамленьні.
Агенцтва супрацы ў абароне ЗША паведаміла, што для гэтых закупаў Украіна выкарыстае фінансаваньне з Даніі, Нідэрляндаў і Нарвэгіі, а таксама праграму замежнага вайсковага фінансаваньня (FMF) ЗША.
«ERAM — гэта прыклад супрацы з нашымі саюзьнікамі ў NATO ў распрацоўцы магутнай і маштабавальнай сыстэмы, якую можна хутка ўкараніць», — гаворыцца ў паведамленьні.
Ракеты ERAM маюць далёкасьць палёту 450-460 кілямэтраў, хуткасьць прыблізна 700 кілямэтраў у гадзіну, яны ўстойлівыя да сродкаў радыёэлектроннай барацьбы.
ERAM могуць несьці самалёты F-16, МіГ-29 і Су-27, якія мае Ўкраіна. Ракеты здольныя паражаць радарныя станцыі, сыстэмы супрацьпаветранай абароны і морскія цэлі.
У DSCA падкрэсьлілі, што плянаваная ўгода ня зьменіць асноўнага вайсковага балянсу ў рэгіёне.
Агенцтва ўжо выдала ўсе неабходныя сэртыфікаты і апавясьціла Кангрэс аб плянаваным продажы. Асноўнымі падраднікамі названыя Zone 5 Technologies і Aspire.
Раней афіцыйныя асобы ЗША паведамлялі выданьню WSJ, што выкарыстаньне Ўкраінай ракет ERAM, максымальны радыюс дзеяньня якіх 450 кілямэтраў, вымагае ўхваленьня Пэнтагону.
З канца вясны ЗША не даюць Украіне дазволу наносіць удары па тэрыторыі Расеі ракетамі вялікай далёкасьці. Ідзецца ня толькі аб амэрыканскіх ракетах, але і аб пастаўленай Украіне эўрапейскімі краінамі зброі, якая выкарыстоўвае для навядзеньня амэрыканскія выведныя зьвесткі і зьмяшчае кампанэнты з ЗША. У прыватнасьці, ухвала Пэнтагону патрабуецца для выкарыстаньня брытанскіх ракет Storm Shadow.
Зяленскі заявіў, што да канца году ва Ўкраіне запусьцяць масавую вытворчасьць сваіх дальнабойных ракет «Флямінга».
Мэханізм разгляду запытаў Кіева на выкарыстаньне зброі вялікай далёкасьці распрацаваў намесьнік міністра абароны ЗША ў пытаньнях палітыкі Элбрыдж Колбі. Апошняе слова ў прыняцьці рашэньня застаецца за міністрам абароны.
Раней прэзыдэнт ЗША Дональд Трамп пісаў у сваёй сацыяльнай сетцы Truth, што Джо Байдэн не даваў Украіне нападаць, а дазваляў толькі абараняцца.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.