Першая намесьніца міністра юстыцыі Ўкраіны Алена Сукманава заявіла, што камісія міністэрства адмяніла рашэньне аб дзяржаўнай рэгістрацыі права карыстаньня на комплекс збудаваньняў Сьвята-Ўсьпенскай Пачаеўскай лаўры рэлігійнай арганізацыяй «Пачаеўская Сьвята-Усьпенская лаўра».
Сьвята-Ўсьпенская Пачаеўская лаўра ў горадзе Пачаеве Крамянецкага раёну Цярнопальскай вобласьці — найбольшая праваслаўная сьвятыня Валыні і другая ва Ўкраіне пасьля Кіева-Пячэрскай лаўры.
Арганізацыю «Пачаеўская Сьвята-Усьпенская лаўра» ўзначальвае мітрапаліт Украінскай праваслаўнай царквы маскоўскага патрыярхату Ўладзімір (Мароз), цяперашні настаяцель Пачаеўскай лаўры.
Паводле паведамленьня міністэрства, такім чынам камісія ў пытаньнях разгляду скаргаў у сфэры дзяржаўнай рэгістрацыі задаволіла скаргу Крамянецка-Пачаеўскага дзяржаўнага гісторыка-архітэктурнага запаведніку.
Члены міністэрскай камісіі прыйшлі да высновы, што рэгістратар ажыцьцявіў дзяржаўную рэгістрацыю права карыстаньня на комплекс збудаваньняў лаўры (Усьпенскага сабора, Траецкага сабора, манастырскіх кельляў, архіярэйскага дома, званіцы, надбрамнага корпуса) з парушэньнямі патрабаваньняў дзейнага заканадаўства.
«Менавіта таму гэтае рашэньне аб дзяржаўнай рэгістрацыі было адмененае, а дзяржаўнаму рэгістратару, які яго прыняў, заблякаваны доступ у дзяржаўны рэестар правоў на нерухомую маёмасьць», — адзначыла першая намесьніца міністра.
