На сайце Арганізацыі Аб’яднаных Нацыяў зьявілася поўная справаздача з паседжаньня Трэцяга камітэту ААН, прысьвечанага сытуацыям з правамі чалавека ў Бурундзі, Іране, Самалі, Эрытрэі, сэктары Газа і Беларусі.
Пра сытуацыю ў Беларусі расказаў Міклаш Харасьці, які быў адмысловым дакладчыкам ААН па правах чалавека ў Беларусі з 2012 году. Неўзабаве на гэтую пасаду прыйдзе Анаіс Марэн.
Харасьці заявіў, што прычыны, дзеля якіх мандат адмысловага дакладчыка па Беларусі быў працягнуты на 6 гадоў, па-ранейшаму актуальныя, назіраецца нават некаторае пагаршэньне сытуацыі.
Харасьці адзначыў глыбокае ўкараненьне сыстэмнай зьнявагі правоў чалавека ў Беларусі, «сумны лёс» свабоды слова ў краіне. У прыватнасьці, ён згадаў:
- абнаўленьне закону «Аб СМІ», скіраванае супраць свабоды слова ў інтэрнэце;
- «справу БелТА» супраць незалежных СМІ;
- абмежаваньне свабоды мірных сходаў; умовы арганізацыі мітынгаў, якія робяць легальны пратэст «бессэнсоўным»; забарона ня проста мірных сходаў, а нават адзіночных пікетаў;
- сьмяротнае пакараньне, якое працягваюць ужываць і адмаўляюцца скасоўваць са спасылкай на рэфэрэндум, вынікі якога міжнародныя органы лічаць фальсыфікаванымі;
- успрыманьне правоў чалавека як нечага, што даецца грамадзянам дзяржавай, а не як нечага неад’емнага — на прыкладзе правоў ЛГБТ;
- адмову рэгістраваць новыя палітычныя партыі, якая трывае ўжо 20 гадоў;
- цыклічнае паўтарэньне ўжываньня гвалту і масавых затрыманьняў актывістаў, якое падтрымліваецца юрыдычнай сыстэмай, арыентаванай на здушэньне іншадумства;
- дзяржаўны плян па правах чалавека, які не прадугледжвае сапраўды значных дзеяньняў;
- адмову ад закону супраць хатняга гвалту як «дурасьці з Захаду» і падтрымку гвалту супраць дзяцей словамі Аляксандра Лукашэнкі;
- і іншае.
Прадстаўніца Беларусі Іна Васілеўская назвала сустрэчу «фарсам» і зноў адзначыла, што сытуацыя ў Беларусі не вымагае адмысловага дакладчыка, а тэма правоў чалавека выкарыстоўваецца дзеля «палітычных маніпуляцыяў».
Тым ня меней прадстаўнікі Эўразьвязу, Чэхіі, Нямеччыны, Літвы, Польшчы, Вялікай Брытаніі, Нарвэгіі і ЗША фактычна падтрымалі даклад Харасьці, выказваючы жаль з прычыны сытуацыі ў Беларусі і задаючы дадатковыя пытаньні пра яе. На баку беларускіх уладаў з прысутных выступіў прадстаўнік Сырыі.
