Падчас затрыманьня 65-гадовага кіроўцы Audi, які ня выканаў патрабаваньня ДАІ спыніцца, супрацоўнікі міліцыі дзейнічалі правамерна і прафэсійна. Так пракамэнтаваў ужываньне табэльнай зброі міністар унутраных спраў Ігар Шуневіч, піша БелТА.
Што адбылося?
Удзень 18 верасьня ў Менску праваахоўнікі спрабавалі спыніць аўтамабіль Audi — відавочцы публікавалі відэа таго, як ля мэтро «Маладзёжная» міліцыянты літаральна чапляліся рукамі за машыну і стралялі па колах.
Паводле ГУУС Менгарвыканкаму, пагоню пачалі ад вёскі Лашаны, што на паўдарозе ад Радашковічаў да Менску. На наступны дзень 65-гадовага кіроўцу аштрафавалі на 1102 рублі 50 капеек.
Што сказаў Шуневіч?
«Перакананы, што супрацоўнікі дзейнічалі правамерна і дастаткова прафэсійна, таму што ніхто не пацярпеў, а гэта самае галоўнае», – сказаў Шуневіч.
Паводле кіраўніка МУС, закон дазваляе ўжываць зброю, каб спыніць парушальнікаў, але ў горадзе гэта рабіць «патэнцыйна небясьпечна».
