Упаўнаважаная па правах чалавека Вярхоўнай рады Ўкраіны Людміла Дзянісава расказала на Facebook, што 11 зьняволеных ва Ўкраіне расейцаў напісалі ліст Уладзіміру Пуціну, у якім папрасілі абмяняць іх на «аднаго з украінскіх палітвязьняў».
На каго прапануецца абмен, не гаворыцца — называюцца толькі імёны тых, хто папрасіў аб абмене. Іхныя лісты будуць накіраваныя дыпляматычнай поштай празь Міністэрства замежных справаў Украіны ў адміністрацыю прэзыдэнта Расеі.
Раней Людміла Дзянісава і ейная расейская калега Тацяна Маскалькова ўзгаднілі сьпіс з 34 асобаў, зьняволеных ва Ўкраіне і ў Расеі, якіх яны зьбіраліся наведаць, ды неўзабаве абвінавацілі адна адну ў нежаданьні выконваць дамоўленасьць; расейскія ўлады не дазволілі Дзянісавай сустрэцца з Алегам Сянцовым, Станіславам Клыхам і Раманам Сушчанкам.
Тым часам Сянцоў чацьвёрты месяц трымае галадоўку, патрабуе вызваліць 71 украінскага палітвязьня з расейскіх турмаў.
