«Завяршаецца перамяшчэньне „Арэшніка“ на тэрыторыю Беларусі. Мы разумеем, дзе гэта будзе, дзе будзе разьмешчаны. Інфармацыю перадаём нашым партнэрам. Мяркую, партнэры самі могуць ацаніць гэтую пагрозу і зразумець, як ім на гэта рэагаваць», — сказаў Уладзімір Зяленскі ў Варшаве на супольнай з польскім прэзыдэнтам Каралем Наўроцкім прэсавай канфэрэнцыі.
Паводле яго, украінскі бок папярэджваў эўрапейскіх і амэрыканскіх партнэраў аб разьмяшчэньні Расеяй гэтага комплексу ў Беларусі.
«Мы паказвалі дыстанцыю, на якую будзе дзейнічаць „Арэшнік“. Гэта пагроза шмат якім эўрапейскім краінам, уключаючы Польшчу, Нямеччыны і іншыя краіны. Мы гэта ім паказвалі. „Арэшнік“ дронамі зьбіць немагчыма на сёньня. Яны выкарыстоўвалі „Арэшнік“ па тэрыторыі Ўкраіны, мы разумеем, як з гэтым змагацца», — дадаў ён.
Зяленскі дадаў, што ўкраінскі бок прасіў партнэраў увесьці санкцыі супраць кампаній, якія знаходзяцца, як на эўрапейскім, так і на іншых кантынэнтах, якія прадаюць праз трэція краіны кампанэнты для «Арэшніка». «Бяз гэтых кампанэнтаў Расея разьвіваць вытворчасьць „Арэшнікаў“ проста ня можа. Я ня бачу пакуль што гэтых санкцый. Мяркуем, што Расея будзе працягваць вырабляць „Арэшнік“. [...] Але пакуль што яна няздольная вырабляць яго ў вялікай колькасьці», — адзначыў прэзыдэнт Украіны.
«У мяне пытаньне дастаткова лягічнае. Калі партнэры нашы — і Злучаныя Штаты, і іншыя — праводзяць шмат дыпляматычных намаганьняў для завяршэньня вайны, ці могуць нашы партнэры таксама ціснуць на Расею, каб яна не разьмяшчала бліжэй да Эўропы, да межаў з Польшчай „Арэшнік“? Гэтым варта займацца, бо, мяркую, у іншым выпадку складана зразумець, а чаму Расея атакуе амэрыканскія сыстэмы СПА на тэрыторыі Ўкраіны. Чаму тады партнэры ня робяць высновы аб пагрозах на тэрыторыі Беларусі, якімі кіраваць будзе Расейская Фэдэрацыя. Безумоўна, Расейская Фэдэрацыя, як і ракеты ў першую ноч, як вы памятаеце поўнамаштабнае ўварваньне, якія забівалі нашых людзей, ляцелі на тэрыторыю нашай дзяржавы зь Беларусі», — заявіў Уладзімір Зяленскі.
Прэзыдэнт Польшчы Караль Наўроцкі не камэнтаваў пытаньне аб разьмяшчэньні «Арэшніка» ў Беларусі, але згадаў аб пагрозах зь беларускай тэрыторыі, а таксама аб дронах, што заляцелі ў Польшчу зь Беларусі сёлета ў верасьні.
«Вядома ж, Польшча знаходзіцца ў стане гібрыднай вайны з Расейскай Фэдэрацыяй і Беларусьсю, шматгадовай гібрыднай вайны. Падкрэсьліваю, гібрыднай вайны. Атака і ціск на ўсходнюю мяжу Польшчы, на польскую мяжу зь Беларусьсю», — сказаў польскі прэзыдэнт.
Форум