На плятформе Talaka.org для сплаты Вікай Біран штрафу сабралі на момант публікацыі амаль 900 рублёў.
Суд Цэнтральнага раёну Менску 16 ліпеня пакараў заснавальніцу гендэрнага праекту Makeout Віку Біран штрафам у памеры 367,5 рубля (15 базавых велічынь). Біран прызналі вінаватай у арганізацыі «масавага мерапрыемства».
«Мы думалі, што будзе няёмка прасіць людзей грошы адразу на тры штрафы, але цяпер мы цалкам падрыхтаваныя. Чакаем позваў і прысудаў ад двух астатніх судоў», — сказала Віка Біран Свабодзе.
Наступны працэс супраць Біран пройдзе 23 ліпеня ў судзе Маскоўскага раёну Менску. Актывістку абвінавачваюць у арганізацыі і правядзеньні масавага мерапрыемства паводле ч. 1 арт. 23.34 КоАП.
Арыткул прадугледжвае: папярэджаньне, штраф да 30 базавых велічынь (735 рублёў) ці адміністрацыйны арышт.
Што важна ведаць
- 17 траўня, у Міжнародны дзень барацьбы з гамафобіяй, амбасады Вялікай Брытаніі і ЗША ў Менску вывесілі вясёлкавыя сьцягі.
- 20 траўня Міністэрства ўнутраных спраў апублікавала заяву, дзе назвала аднаполыя адносіны падробкай.
- 21 траўня на сайце petitions.by пачаўся збор подпісаў «За міліцыю для ўсіх». У пэтыцыі просяць праверыць законнасьць выказваньняў МУС. На момант публікацыі пад пэтыцыяй падпісалася больш за 1800 чалавек.
- 21 траўня кіраўнік МУС Ігар Шуневіч назваў вывешваньне міжнароднага сымбаля ЛГБТ-супольнасьці прапагандай «непрымальнага» ладу жыцьця.
- Ад 22 траўня ў адказ на заяву МУС у сацыяльных сетках пачалі зьяўляцца допісы з тэгам #янеподделка.
- 23 траўня міністар замежных спраў Уладзімер Макей заявіў, што існуе шэраг рэчаў, «непрымальных» для беларускага мэнталітэту. Макей адзначыў важнасьць і неадназначнасьць тэматыкі «правоў мяншыняў».
- 30 траўня старшыня Моладзі БНФ скрытыкавала «навязваньне ЛГБТ» і «паўсюднае вывешваньне сваёй сымболікі».
- 7 чэрвеня Шуневіч заявіў, што «ахова маральнасьці» — гэта функцыя МУС, хоць такой функцыі ў законе «Аб органах унутраных справаў» няма.
- 16 чэвеня партрэт Ігара Шуневіча несьлі на прайд-парадзе ў ЗША.
