Два дэпутаты парлямэнту Нарвэгіі вылучылі прэзыдэнта ЗША Дональда Трампа на Нобэлеўскую прэмію міру пасьля сустрэчы Трампа з паўночнакарэйскім лідэрам Кім Чэн Ынам.
Хрысьціян Тыбрынг-Г'едэ і Пэр-Вілі Амундсэн, якія належаць да Партыі прагрэсу, у сераду заявілі нарвэскаму інфармагенцтву NTB, што прэзыдэнт Трамп «зрабіў велізарны і важны крок у ў бок раззбраеньня, міру і прымірэньня паміж Паўночнай і Паўднёвай Карэяй».
Яшчэ ў траўні 2018 году 18 амэрыканскіх кангрэсмэнаў-рэспубліканцаў выступілі з прапановай уганараваць Трампа Нобэлеўскай прэміяй міру за 2019 год.
Сам прэзыдэнт Трамп тады ж, у траўні, адказаў на пытаньне пра прэмію:
«Вы ведаеце, што я хачу зрабіць? Я хачу завяршыць дэнуклеарызацыю Карэйскага паўвострава. Прэмія, якую я хачу, — гэта перамога для ўсяго сьвету, нават не для нас, а перамога для ўсяго сьвету. Гэта адзіная прэмія, якую я хачу».
Разгляд і прысуджэньне ўзнагароды адбываецца ў Нарвэгіі.
Кандыдатуры павінны быць паведамленыя Нобэлеўскаму камітэту да першага лютага.
