У Львове праваахоўныя органы высьвятляюць абставіны забойства грамадзка-палітычнага дзеяча.
Як паведаміла «Українська правда», загінуў колішні старшыня Вярхоўнай Рады Ўкраіны, актыўны ўдзельнік Эўрамайдану, народны дэпутат Андрэй Парубій. У яго выстралілі некалькі разоў, на месцы знайшлі 7 гільз.
Нападнік быў апрануты як кур'ер службы дастаўкі. Яго цяпер шукаюць.
Мясцовая паліцыя паведаміла, што стральба адбылася ў Сыхаўскім раёне Львова. У выніку атрыманых раненьняў Андрэй Парубій загінуў на месцы.
Прэзыдэнт Украіны Ўладзімір Зяленскі выказаў спачуваньні сваякам і блізкім забітага. Ён паведаміў, што міністар унутраных спраў Ігар Кліменка і генэральны пракурор Руслан Краўчанка паведамілі яму «аб першых вядомых абставінах жахлівага забойства».
Пазьней у львоўскай паліцыі паведамілі аб «вялікай колькасьці вэрсій», у тым ліку, разглядаюць расейскі сьлед.
Андрэй Парубій нарадзіўся ў 1971 годзе. Быў у палітыцы з 1990 году, пачынаў як дэпутат Львоўскай абласной рады.
Што Андрэй Парубій казаў пра Беларусь
Андрэй Парубій у 2020 годзе ўвайшоў у склад міжфракцыйнага дэпутацкага аб’яднаньня «За дэмакратычную Беларусь».
У сьнежні 2019 году ён заявіў, што Расея і рэжым Пуціна пагражае сувэрэнітэту Беларусі. Ён быў перакананы, што з расейскім прэзыдэнтам нельга дамовіцца.
«Мэта Пуціна адна: узяць цалкам пад кантроль і Малдову, і Беларусь, і Грузію, але я адважуся сказаць, перш за ўсё Ўкраіну ён хоча ўзяць пад кантроль, — заявіў Парубій. — У яго ёсьць маніякальная ідэя: аднаўленьне геапалітычнай моцы Крамлю, якая была ў часы Савецкага Саюзу. Але яны разумеюць, што імпэрыя ня мае ніякіх шанцаў без Украіны, таму для яго ключавой пытаньне — гэта параза Украіны, гэта кантроль над гэтай краінай», — казаў Андрэй Парубій.
Форум