Алімпійскай чэмпіёнцы Пхёнчхану-2018 Ганне Гуськовай 25 гадоў, нарадзілася ў Менску. У фрыстайл прывялі бацькі, калі дачцэ споўнілася 7 гадоў. Да таго марыла стаць журналісткай ці фатографам.
Фрыстайлістка Ганна Гуськова прынесла першае золата Беларусі ў Пхёнчхане
На міжнародных спаборніцтвах пачала выступаць 10 гадоў таму, прызэрка этапаў Кубку Эўропы сярод юніёраў. У 17-гадовым узросьце адабралася на першым этапе Кубку сьвету ў катэгорыі юніёраў. У 2012-м стала срэбнай прызэркай юніёрскага чэмпіянату сьвету.
Сёлетні сэзон у яе кар’еры стаў самым пасьпяховым. Спачатку выйграла этап Кубку сьвету ў Кітаі, а пасьля гэтага была другой на аналягічным этапе ў ЗША.
На Алімпійскіх гульнях дэбютавала ў 2014 годзе ў Сочы. Тады Міжнародная фэдэрацыя лыжнага спорту дала Беларусі дзьве дадатковыя жаночыя ліцэнзіі, але Ганна не прайшла нават кваліфікацыю.
Ганна Гуськова — алімпійская чэмпіёнка. Глядзіце, як гэта было
Але ўжо другія па ліку Гульні ў яе спартовым жыцьці сталі, без перабольшаньня, трыюмфальнымі. Хоць The Associated Press у сваім вялікім прагнозе і «аддавала» беларусцы толькі другое месца.
Увесь мінулы сэзон спартоўка прапусьціла з-за траўмы. Падчас адной з трэніровак няўдала прызямлілася і пашкодзіла мэніск — давялося класьціся на апэрацыю. А да гэтага было сур’ёзнае хірургічнае ўмяшаньне з-за разрыву пярэдняй крыжападобнай зьвязкі калена.
У ранейшых інтэрвію Ганна Гуськова прызнавалася, што любіць татуіроўкі, яе цела ўпрыгожваюць некалькі малюнкаў. Казала, што тату раскрывае яе характар і дапаўняе ўнутраны сьвет.
Іншае захапленьне — шыцьцё. Яна мае сваю швэйную машынку і пасьля заканчэньня спартовай кар’еры марыць папрактыкавацца ў дызайне моднага адзеньня.
За залатую ўзнагароду Ганна Гуськова атрымае 150 тысяч даляраў ад беларускай дзяржавы — такі памер вызначаны за алімпійскую перамогу.
Віншаваньне ад Домрачавай:
