У запрашэньні на імшу біскуп вікары Магілёўскага рэгіёну Аляксандар Яшэўскі напісаў, што адзначаючы сьвята «трэба дзякаваць Богу за дар Божага слова на роднай мове і яшчэ раз асэнсаваць значэньне Бібліі ў духоўным разьвіцьці нашай краіны».
Скарына, казаў на імшы сьвятар, «даў людзям Божае слова на іх простай зразумелай мове, каб яе чыталі і адтуль чэрпалі сілы».
«Трэба вернікам Беларусі падзякаваць Богу за дар Францыска Скарыны, за дар Божага слова на роднай мове і за свабоду веравызнаньня, — прамаўляў сьвятар далей. — За тое, што там, дзе адчыненыя сьвятыні мы мае магчымасьць слухаць Божае слова на роднай мове і дзякуючы роднаму слову перамяняцца».
У сваім выступе Аляксандар Яшэўскі заклікаў вернікаў не забывацца на беларускую мову, бо праз яе яны могуць напоўніцу адчуць сябе «дзецьмі сваёй краіны, якая мае сваю прыгожую вялікую культуру».