Саліст амэрыканскага гурту Linkin Park Чэстэр Бэнінгтан знойдзены мёртвым у сваім доме пад Лос-Анджэлесам, перадае Associated Press. Яму быў 41 год.
Паводле амэрыканскіх СМІ, Бэнінгтан скончыў жыцьцё самагубствам. Музыка быў два разы жанаты, у яго засталося шасьцёра дзяцей.
Таблоід TMZ адзначае, што ў Бэнінгтана доўгія гады былі праблемы з алькаголем і наркотыкамі. У адным з інтэрвію ён прызнаваўся, што падумваў пра самагубства з прычыны таго, што ў дзяцінстве зазнаў сэксуальны гвалт.
Бэнінгтан нарадзіўся ў Фініксе ў 1976 годзе. Музычную кар’еру ён пачаў у 17 гадоў у групе Gray Daze, а ў 1997 годзе стаў вакалістам гурту Linkin Park.
