Беларускі прэм’ер Міхаіл Мясьніковіч правёў у ЗША шэраг сустрэч, у тым ліку з кангрэсмэнам ад дэмакратычнай партыі Хакімам Джэфрысам.
Як паведамляе прэсавая служба беларускага ўраду, на сустрэчы былі абмеркаваныя пытаньні палітычнага ўзаемадзеяньня.
«Мы гаварылі пра палітыку, пра санкцыі. Я сказаў пра тое, што няма падставаў, каб цэлы шэраг прадпрыемстваў Беларусі знаходзіўся пад санкцыямі», — распавёў прэм’ер-міністар Мясьніковіч.
Акрамя таго, беларускі прэм’ер выказаўся за стварэньне рэжыму большага даверу ў адносінах Беларусі і ЗША:
«Мы дамовіліся, што па лініі Палаты прадстаўнікоў Кангрэсу ЗША будзе разгледжана пытаньне пра магчымасьць накіраваньня іх прадстаўнікоў у Беларусь, каб паглядзець, якія ў рэчаіснасьці ствараюцца ўмовы для актыўнага бізнэсу і якія трэба было б прыняць палітычныя рашэньні, каб стварыць адпаведныя камфортныя ўмовы для гандлёва-эканамічнага і інвэстыцыйнага супрацоўніцтва», — паведаміў прэм’ер-міністар Мясьніковіч.
