پاکستان د افغان تابعیت (سېټېزن) کارډونو لرونکو کډوالو خپل هېواد ته د لېږدولو دویم پړاو پیل کړی دی.
د خیبر یو انتظامي چارواکي، چې له رسنیو سره یې د خبرو اجازه نه لرله، د نوم نه خپرولو په شرط مشال راډیو ته وویل چې د اپرېل پر درېیمه له پنجابه خواوشا شپږ افغان سېټېزن کارډ لرونکې کورنۍ لنډي کوتل (لواړګي) ته تر رسېدو وروسته افغانستان ته ولېږدول شوې.
هغه کارډونه د پاکستان د وګړو د نوملیکنې، شناختي کارډونو او نورو اسنادو ادارې (نادرا) افغانانو ته ورکړي ول.
افغانستان ته د هغو کډوالو د ستنېدو لپاره چارواکو په لنډي کوتل کې موقتي کيمپ جوړ کړی دی.
چارواکي وویل، تر اوسه په کیمپ کې د استوګنې او رجسټرېشن بشپړ انتظام نه دی شوی نو ځکه یې هغه کورنۍ مستقیمې تورخم ته واستولې چې هلته د ټولو کسانو بایومیټرېک معلومات ثبت شول او افغانستان ته ولېږدول شول.
د پاکستان د حکومت له خوا بې اسناده او د افغان تابعیت یا سېټېزن کارډ لرونکو افغانانو ته په خپله خوښه د هغه هېواد د پرېښودو ضرب الاجل (مهلت) د مارچ پر ۳۱مه پای ته ورسېد.
تر دې وړاندې، اسوشيېټېډ پرېس او فرانس پرېس اژانسونو د پاکستانيو سرچينو په حواله ويلي ول چې د افغان کډوالو د ستنولو بهير د اپرېل تر ۱۰مې ځنډول شوی دی.
خو د پاکستان د انګرېزۍ ژبې ډان ورځپاڼې د کورنیو چارو وفاقي وزارت د یو چارواکي، چې نوم یې نه دی ښوول شوی، په حواله ویلي دي چې حکومت د اپرېل تر دویمې د کوچني اختر د رخصتیو (چوټیو) له وجې د افغانانو د لېږدولو بهیر ځنډولی وو.
د پاکستان حکومت د ۲۰۲۵ز کال د جنورۍ په پای کې په یو فرمان کې په راولپېنډۍ او اسلام اباد کې مېشتو افغانانو ته د مارچ تر پایه د هغو ښارونو د پرېښودو امر وکړ.
اسلام اباد البته وايي چې د ملګرو ملتونو د کډوالو ادارې (یو اېن اېچ سي ار) د مهاجرت کارډونو (پروف اف رجسټرېشن یا پي او ار) لرونکي د ۲۰۲۵ز کال د جون تر ۳۰مې په پاکستان کې د پاتې کېدو قانوني جواز لري.
د ملګرو ملتونو د کډوالو ادارې، د مهاجرت نړیوال سازمان او د بشري حقونو کمېشن په ګډون د حقونو کورنیو او نړیوالو سازمانونو، پښتونخوا ملي عوامي ګوند، پښتون ژغورنې غورځنګ او په هغه هېواد کې د افغان کډوالو مشرانو په تېرو میاشتو کې څو ځلې د افغانانو پر ایستلو اندېښنه ښوولې او له حکومته یې غوښتي دي چې افغانان دې په زور نه ستنوي.
په افغانستان کې د طالبانو حکومت هم پر پاکستان غږ کړی چې افغان کډوال دې له هغه هېواده په زور نه باسي او په خپله خوښه دې ورته د ستنېدو موقع ورکړي.
خو د پاکستان وفاقي حکومت وايي، د افغانانو ایستلو ته ژمن دی او دا کار د ملي امنیت په ګټه بولي.
پاکستان د ۲۰۲۳ز کال له نومبر راهیسې له ۸۰۰،۰۰۰ زیات افغانان هېواد ته ستانه کړي دي.
د ۲۰۲۳ز کال په اکتوبر کې د پاکستان د هغه وخت لنډمهاله حکومت بې اسناده بهرنیانو ته د اکتوبر تر ۳۱مې په خپله خوښه د وتلو ویلي ول. د هغه کال د نومبر له لومړۍ راهیسې له پاکستانه د بې اسناده افغانانو په زور د ایستلو بهیر پیل شو.
