د افغانستان کرکټ ملي لوبډلې بنګلادېش ته په پرلپسې دويمه يو ورځنۍ يا ۵۰ اووريزه لوبه کې په ماتې ورکولو سره د درو يو ورځنيو سياليو لوبلړۍ وګټله.
د دواړو هېوادونو ترمينځ دويمه يو ورځنۍ لوبه د اکتوبر پر ۱۱مه د متحده عربي اماراتو د ابوظهبۍ په لوبغالي کې وشوه.
افغان لوبډلې لومړی توپوهنه وکړه او په ۴۵م اوور کې يې د ټولو لوبغاړو په زيان ۱۹۰ منډې وکړې.
په ځواب کې د بنګلادېش ټول لوبغاړي د ۱۰۹ منډو تر جوړولو وروسته په ۲۹م اوور کې وسوځېدل.
تر دې وړاندې، د اکتوبر پر اتمه هم افغانستان بنګلادېش ته په پينځو وېکټو ماتې ورکړې وه.
د دواړو هېوادونو ترمينځ به درېيمه او وروستۍ يو ورځنۍ لوبه د اکتوبر پر ۱۴مه کېږي.
تر ۵۰ اووريزو سياليو وړاندې، افغانستان او بنګلادېش درې ۲۰ اووريزه سیالۍ هم وکړې چې ټولې بنګلادېش وګټلې.
