چارواکي وايي په کورمه کې په بمي چاودنو کې لږ تر لږه څلور کسان وژل شوي دي او څلور نور ژوبل دي.
په بره کورمه کې د پولیسو یوه چارواکي د جون پر ۲۵مه د نوم نه ښودلو په شرط مشال راډیو ته وویل چې په پیوار شرمه خېلو کې سهار مهال غبرګې چاودنې وشوې چې پکې ځايي خلکو ته مرګژوبله واوښتله. نوموړی وايي، د دوی لومړني معلومات ښيي چې دا د ریموټ بم چاودنې وې.
د پاړه چینار د مرکزي روغتون مشر ډاکټر میرحسن جان هم مشال راډیو ته ویلي دي چې هغوی ته څلور ژوبل کسان وروړل شوي وو چې د یوه حالت نازک وو او هغه د نورې درملنې لپاره پېښور ته استول شوی دی.
په سیمه کې د پولیسو چارواکي وايي، دم ګړۍ ته معلومات نه لري چې د برید تر شا به څوک لاس لري؟ خو د هغوی پلټنې روانې دي.
بل پلو، کومې وسلوالې ډلې تر اوسه په دې اړه څه نه دي ویلي.
په کورمه کې د شیعه او سني ډلو ترمینځ او د مختلفو قبیلو ترمینځ خپلمنځي تربګنۍ هم موجودې دي چې کله کله پکې ولسي کسان وژل کېږي خو د دې تازه چاودنو په اړه تر اوسه معلومات نشته چې چا کړې دي؟
په کورمه کې سنیان او شیعه ګان ګډ ژوند کوي خو په بېلابېلو وختونو کې یې ترمینځ د ځمکو، ځنګلونو او نورو ملکيتونو پر سر وسلوالې نښتې شوې دي چې پکې ګڼ کسان وژل شوي او بې کوره شوي دي. له دې پرته، د شیعه ګانو او سنیانو ترمینځ د دیني رسوماتو پر سر اختلافات او یا هم د دیني مشرانو پر ضد ویناګانې هم د وسلوالو نښتو لامل کېږي.
