د پاکستان او بنګلادېش د کرکټ ملي لوبډلې په دويمه ۲۰ اووره لوبه کې یو بل ته مخامخېږي.
د لاهور په قذافي لوبغالي کې د مې پر ۳۰مه سیالي د پېښور پر وخت د ماخوستن پر اته او د کابل پر اووه نيمو بجو پیلېږي.
تر دې وړاندې، د مې پر ۲۸مه پاکستان بنګلادېش ته په لومړۍ ۲۰ اووره لوبه کې په ۳۷ منډو ماتې ورکړې وه.
دواړې لوبډلې به د ۲۰ اووره لوبلړۍ درېيمه او وروستۍ سيالي د جون پر لومړۍ نېټه په لاهور کې کوي.
په پاکستان کې تر دې وړاندې، د پاکستان سوپر لیګ (پي اېس اېل) په نوم د ۲۰ اووره کرکټ د ۱۰م پړاو سیالۍ تر سره شوې چې پايلوبه يې د مې پر ۲۵مه د لاهور په قذافي لوبغالي کې وشوه.
په هغه سيالۍ کې لاهور قلندرز کوټه ګلېډيېټرز لوبډلې ته په ماتې ورکولو سره د پي اېس اېل د ۱۰م پړاو سياليو اتله شوه.
