په افغانستان کې د طالبانو د حکومت له خوا د دوو زنداني شویو برتانوي وګړو زوی جانتن رينلډز د امریکا له ولسمشر ډانلډ ټرمپ څخه غوښتي چې د مور او پلار په خوشې کولو کې مرسته ورسره وکړي.
د اپرېل څلورمې په هغه ویډیو کې چې رینلډز مشال راډیو ته لېږلې، پکې ليدل کېږي چې نوموړی له خپلې لور سره د سپینې ماڼۍ مخې ته ولاړ دی او له ولسمشر ټرمپ څخه د مرستې غوښتنه کوي.
هغه وايي "موږ ته په وار وار ویل شوي چې دوی [باربي او پيټر رينلډز] بې ګناه دي، هیڅ جرم یې نه دی کړی او ډېر ژر به خوشې شي. خو دوی لا هم په زندان کې دي. د برتانیا حکومت موږ ته ویلي چې زما د مور او پلار د خوشې کولو لپاره به په خپل ټول توان سره هڅه وکړي. خو د یو برتانوي او امریکايي تبعه په توګه، زه دلته ولاړ یم او له تاسو څخه غواړم چې له زندان او له هغه هېواده زما د مور او پلار د ایستلو په برخه کې مرسته وکړئ."
د امريکا حکومت لا تر اوسه د جانتن رينلډز غوښتنې ته ځواب نه دی ويلی.
د طالبانو حکومت د روان کال د فبرورۍ پر لومړۍ نېټه ۷۹ کلن پيټر رينلډز او د هغه مېرمن ۷۵ کلنه باربي رينلډز نيولي ول.
د طالبانو د کورنيو چارو وزارت وياند عبدالمتين قانع له فرانس پرېس خبري اژانس سره د خبرو پر مهال د هغوی د نيولو لامل نه وو ښوولی، البته نوموړي دعوه کړې وه چې هغوی د افغانستان پاسپورټونه او تذکرې لرلې چې په اړه یې پلټنې ورڅخه کوي.
د راپورونو له مخې، هغوی له ۱۸ کلونو راهیسې په افغانستان کې د مېندو او ماشومانو لپاره روزنیزې پروژې پرمخ وړلې.
د برتانيې حکومت د ۲۰۲۴ز کال په سېپټېمبر کې خپلو وګړيو ته خبرداری ورکړی وو چې افغانستان ته له سفره ډډه وکړي.
طالبانو تر دې مخکې هم ځيني بهرني وګړي نيولي چې وروسته یې د جوړجاړي په ترڅ کې خوشې کړي دي.
