د خیبر پښتونخوا په شانګله کې په يوه ټرافيکي پېښه کې څلور کسان وژل شوي او يو ژوبل دی.
د شانګلې د ژغورنې او مرستندويه چارو ادارې (رېسکيو ۱۱۲۲) وياند رسول خان مشال راډيو ته وويل چې د اپرېل پر پينځمه د سيلانيانو يو ګاډی د الپورۍ تحصيل په مټه اعوان سيمه کې له يو کمر سره وجنګېد چې پکې سپاره څلور تنه ووژل شول او يو بل ژوبل شو.
نوموړي زياته کړه چې دغه کسان د پنجاب له ملتان ضلعې څخه د شانګلې له لارې په سيل ګلګت بلتستان ته روان ول.
تر دې وړاندې، د مارچ پر ۲۷مه هم په شانګله په يوه ټرافيکي پېښه کې پينځه کسان وژل شوي او درې ژوبل شوي ول.
په پاکستان کې ټرافیکي پېښې زياتره وخت د قوانینو نه عملي کېدو، د سړکونو د خرابوالي، د ډرېورانو د بې احتیاطۍ او د هغوی د سمې روزنې نه کېدو او پر ټاکلي وخت د ګاډو د مرمت او معاینې نه کولو له وجې کېږي.
د دې ترڅنګ په ځینو وړو ښارونو او کلیوالو سیمو کې د ټرافیک کنټرول نظام کمزوری دی چې د حادثو مخه نیول ګرانوي. داراز، په ګاډو کې له اندازې زیات بار لېږدول یې هم کله نا کله توازن خرابوي او د پېښو ښکار کېږي.
د همدې له کبله په خیبر پښتونخوا او د پاکستان په نورو برخو کې وخت په وخت ټرافیکي پېښې خلکو ته ځاني او مالي تاوانونه اړوي.
د جنورۍ پر ۱۱مه د خیبر پښتونخوا په کرک کې د ګاډو ټکر په پېښه کې اته تنه ووژل او ۱۳ ژوبل شول.
تر دې مخکې د ۲۰۲۴ز کال د ډېسېمبر په پای کې په سیند او پنجاب کې په دوه جلا جلا پېښو کې ۱۸ کسان وژل شوي ول.
