د سیند صوبې د ترپارکر په دوو کلیو کې اور لګېدلی دی چې پکې تر ۳۰ زیات کورونه سوځېدلي دي.
د سیمې یو اوسېدونکي دلیپ کمار د اپرېل پر دویمه مشال راډیو ته وویل، اور د اپرېل پر لومړۍ شپې مهال په دوو کلیو بندو او سندري کې لګېدلی دی چې ځايي خلک یې د وژلو هڅه کوي.
د مرستندویه او ژغورنې چارو ادارې (رېسکیو ۱۱۲۲) کارکوونکي هم د اپرېل پر دویمه له سهاره د اور وژلو هڅه کوي.
تر اوسه معلومه نه ده چې پېښې مرګژوبله اړولې او که نه.
ځايي خلکو مشال راډیو ته وویل چې د سختې ګرمۍ او وچکالۍ له کبله په اوروژنه کې له ستونزو سره مخامخ دي.
ترپارکر د سیند له تر ټولو بې وزلو ضلعو یوه ده چې زیاتره برخه یې وچه دښته ده او ډېری برخې یې کلیوالې دي.
د ترپارکر زیاتره اوسېدونکي هندوان دي او ځايي خلک وايي چې د اورلګېدو په پېښه کې سوځېدلي ټول کورونه هم د هندوانو دي.
تر اوسه د اور لګېدو لامل معلوم نه دی خو په سیمه کې د زیاترو کورونو دېوالونه له خټې او چتونه یې له وچ لرګي او لوخو جوړ وي.
