اروپايي ټولنې په افغانستان کې ۵۸۱ ښځې د رواني روغتیا او ۴۱ نورې د ساري ناروغیو د مخنیوي په څانګو کې روزلي دي.
ټولنې د مارچ پر ۱۳مه پر خپله اېکسپاڼه (پخواني ټوېټر) لیکلي دي چې هغه ښځینه طبي کارکوونکي به د روغتیايي خدماتو د وړاندې کولو د کیفیت په ښه کولو کې مرسته کوي.
اروپايي ټولنه په داسې حال کې د ښځینه روغتیايي کارکوونکو د روزنې خبره کوي چې طالبانو تېر کال په طبي انسټېټیوټونو کې د نجونو پر زده کړو بندیز ولګاوه.
د ملګرو ملتونو او د نړۍ د ګڼو هېوادونو په ګډون د بشري حقونو نړیوالو سازمانونو هم په وار وار پر طالبانو غږ کړی دی چې د نجونو زده کړو ته اجازه ورکړي خو هغوی وايي چې د دې لپاره د کړنلارې پر جوړولو کار روان دی. البته طالبان دا نه وايي چې په تېرو څه باندې درې کلونو کې یې په دې برخه کې څومره پرمختګ کړی دی.
دا په داسې حال کې ده چې طالبان د ۲۰۲۱ز کال د اګست پر ۱۵مه پر افغانستان واکمن شول خو لا یې هم د نړۍ هېڅ هېواد حکومت په رسمیت نه دی پېژندلی.
ملګري ملتونه وايي، که طالبان په نړۍ کې په رسمیت پېژندل کېدل غواړي نو د بشري حقونو درناوی دې وکړي او ښځو ته دې ټول حقونه ورکړي. د طالبانو حکومت وايي، "د شریعت په چوکاټ کې" یې ښځو ته ټول حقونه ورکړي دي.
