د افغانستان لپاره د ملګرو ملتونو د مرستندویه ادارې (یوناما) مشرې، روزا اوتنبایېوا وايي که په افغانستان کې د طالبانو حکومت د نړيوال نظام برخه کېدل غواړي، نو خپلې پاليسیانې دې بدلې کړي.
هغې د مارچ پر لسمه، د ملګرو ملتونو د امنیت شورا غونډې ته وویل چې نړیواله ټولنه او اکثریت افغانان د طالبانو لخوا د نجونو او ښځو پر زدهکړو او کار بندیزونه ليرې کېدل غواړي خو د طالبانو حکومت په دې اړه هېڅ نرمښت نه دی ښوولی.
طالبانو د ۲۰۲۱ کال د اګست پر ۱۵مه په افغانستان کې د حکومت تر نيولو وروسته، نجونې له شپږم ټولګي پورته له تعليمه منع کړي او پر ښځو یې ګڼ بندیزونه لګولي دي.
طالبانو د اوتنبایوا د تازه خبرو په اړه څه غبرګون نه دی ښوولی خو په تېر کې یې د ملګرو ملتونو ورته غوښتنې رد کړي دي.
