اسراييل او حماس د مارچ پر اتمه داسې اشارې ورکړې چې ګواکې دواړه خواوې د اوربند خبرو دويم پړاو ته تياری نيسي.
دا په داسې حال کې ده چې د اسراييل او حماس ترمينځ په جنورۍ کې د شوي هغه اوربند ۴۲ ورځې شوې دي چې کمزوری حسابېږي. حماس د امريکې او اروپايي ټولنې لخوا ترهګره ډله اعلان شوې.
رويټرز اژانس د حماس د وياند عبدالطيف القنوا هغه بيان راخيستی چې ويلي يې دي: "موږ د خبرو د دويم پړاو لپاره، په دې خاطر د خپلو تياريو تصديق کوو چې د خلکو غوښتنې مو ومنل شي." نوموړي په عين وخت کې غږ کړی دی چې له غزې تړانګې سره د مرستو په هدف پيل شوې هڅې بايد لا غښتلې او پياوړې شي.
د حماس يو پلاوی په قاهره کې له مصريو منځګړيو سره، چې د قطريو هغو په مرسته د اوربند خبرو د دوام هڅې کوي، په مذاکراتو بوخت دی.
د اسراييلي وزيراعظم بېنيامن نتنياهو دفتر بيا ويلي، د دويم پړاو خبرو د پيل لپاره يې د امريکا په مشرۍ د منځګړيو بلنه منلې او د مارچ پر لسمه به خپل يو پلاوی دوحې ته ولېږي.
