د امریکا ولسمشر ډونالډ ټرمپ وايي چې د ایران لوی مذهبي مشر آیت الله علي خامنه یي ته یې یو لیک استولی او په هغه کې یې نوموړي ته د تهران د اټومي پروګرام په اړه د خبرو وړاندیز کړی دی.
ولسمشر ټرمپ د مارچ پر شپږمه ثبت شوې مرکه کې ویلي چې دا لیک یې یوه ورځ وړاندې استولی دی.
ولسمشر ټرمپ وايي په لیک ک یې لیکلي دي چې هیله من دی خامنه یي به خبرو ته کښېني ګني نو د ده په وینا، " که خبره پوځي اقدام ته ورسېده نو کار به خراب شي."
د ولسمشر ټرمپ د دې مرکې ځینې برخې د مارچ پر اوومه خپرې شوې او پاتې برخه به یې د مارچ پر نهمه خپرېږي.
ټرمپ په دې مرکه کې ویلي دي چې دی خبرو ته لوړمیتوب ورکوي ځکه د ده په وینا له دې خبرو څخه داسې موافقه ترلاسه کېدای شي چې د پوځي بریا په څېر ښه نتیجه ورکولای شي.
نوموړي ټرمپ وروسته په سپینه ماڼۍ کې د څرګندونو پرمهال هم هیله څرګنده کړه چې په نژدې راتلونکي کې به له ایران سره یوه موافقه ترلاسه شي.
ټرمپ د ولسمشر په لومړۍ دوره کې له هغې اټومي موافقې ووت چې په ۲۰۱۵ کال کې د امریکا په ګډون د ۶ لویو قدرتونو او ایران ترمنځ لاسلیک شوې وه.
