د امریکا د استخباراتو د مرکزي ادارې (سي ای اې) مشر تایید کړې چې واشنګټن له اوکراین سره د استخباراتو شریکول درولي دي.
د سي ای اې مشر جان ریټکلېف د مارچ پر پینځمه فاکس نیوز شبکې ته دا هم وویل چې فکر کوي د پوځي مرستو ځنډولو او استخباراتي معلوماتو نه شریکولو عمل به "ژر پای ته ورسي" او زیاته یې کړه چې امریکا به بیا "له اوکراین سره اوږه په اوږه کار وکړي" ځکه چې هغوی "باید د تېري پر وړاندې مقاومت وکړي" چې "د سولې د خبرو په ترڅ کې پرمختګ" وشي او نړۍ د "بهتر وضعیت" پر لوري روانه شي.
اوکراین ته د پوځي مرستو ځنډول او ورسره د استخباراتي معلوماتو نه شریکول ظاهراً د ولسمشر ډانلډ ټرمپ د حکومت د دې لېوالتیا ښکارندويي کوي چې پر اوکراین فشار زیات شي چې د خبرو مېز ته ورشي.
دا په داسې حال کې ده چې ټرمپ د مارچ پر څلورمه وویل، د اوکرایني ولسمشر وولودیمیر زېلېنسکي یو لیک یې ترلاسه کړی دی چې پکې هغه د روسیې او اوکراین ترمینځ د جګړې پر ختمولو د خبرو لپاره د مذاکراتو مېز ته د ورتګ لېوالتیا ښوولې ده.
په همدې حال کې د امریکا د ملي امنیت سلاکار مایکل والټڅ د مارچ پینځمې پر سهار خبریالانو ته وویل چې امریکا "یو ګام شاته تللې" او حکومت یې له اوکراین سره د خپلو استخباراتي اړیکو "ټولو اړخونو ته بیا کتنه کوي."
غربي استخباراتو له اوکراین سره د روسیې د پراخ یرغل په مقابل کې د خپلې دفاع او په روسیه کې د اهدافو په نخښه کولو کې پام وړ مرسته کړې ده.
ټرمپ د مارچ پر درېیمه اوکراین ته ورکول کېدونکې ټولې پوځي مرستې وځنډولې.
تر هغه وړاندې، د فبرورۍ پر ۲۸مه په سپینه ماڼۍ کې د ډانلډ ټرمپ او د هغه د اوکرایني سیال وولودیمیر زېلېنسکي ترمينځ بېسارې لفظي شخړه شوې وه.
