د برېتانیا وزیراعظم پر اوکراین د روسيې د یرغل پر وړاندې د څلورو پړاوونو پلان جوت کړی دی.
د دې پلان تر مخې د اروپايي ټولنې مشران او د ناټو استازی سلا شوي دي چې د اوکراین ملاتړ به کوي او د روسيې د یرغل پر وړاندې به متحد پاتې کېږي.
د برېتانیا وزیراعظم کېر سټارمر د مارچ پر دويمه په لندن کې د سرمشيريزې پر مهال وويل: "وخت رارسېدلی چې د اوکراین د امنیت یقيني کولو لپاره عملي اقدام وشي."
په دې سرمشريزه کې له کیف سره د دوه اربه ډالرو په لګښت د ۵،۰۰۰ هوايی دفاع توغندیو د ورکولو ژمنه وشوه. په سرمشريزه کې فیصله وشوه چې اوکراین ته دې د وسلو لېږد دوام ولري، له روسيې سره د سولې په خبرو کې کيف هم باید شامل وي او اروپا به په راتلونکې کې د اوکراین پرضد د روسيې د ممکنه يرغل د مخنيوي لپاره کار کوي.
د اروپايي مشرانو په وینا، داسې يوه ګډه ډله به جوړوي چې هغه به تر تړون وروسته د اوکراین د سولې ضمانت او دفاع کوي. تر دې وړاندې سټامر او زېلېنسکي د مارچ په لومړۍ نېټه د بندو دروازو شا ته له یو ساعت زیات ملاقات وکړ.
د دوی تر لیدو کتو وروسته د دواړو هېوادونو د مالي چارو مشرانو د ۲.۲۶ اربه پاونډو (۲.۸۴ اربه ډالرو) په ارزښت د پور تړون لاسلیک کړی چې هدف یې د کییف د دفاع پیاوړتیا ده. دا تر هغې وروسته ده چې د اوکراین ولسمشر وولودیمیر زېلېنسکي د امریکا له ولسمشر ډانلډ ټرمپ سره په سپینه ماڼۍ کې داسې بېسارې لفظي شخړه کړې وه چې د اوکراین لپاره د واشنګټن د ملاتړ راتلونکې یې ګواښلې.
