د اسراییلو پوځ په یوه بیان کې ویلي چې د فبرورۍ پر ۱۵مه د حماس وسله والې ډلې لخوا خوشي شوي درې اسراییلي یرغمالیان خپل هېواد ته رسېدلي دي.
رويټرز او اسوشیتید پرېس اژانس خبر ورکړی چې حماس درې نور اسراييلي برمته شوي خوشي کړل او د فبرورۍ پر ۱۵مه يې په غزه کې د سره صليب ادارې ته وسپارل.
امریکا او اروپايي ټولنې حماس وسلواله ډله یو ترهګر سازمان بولي.
اسراييلي ځواکونو ویلي چې په خوشي شوي کسانو کې اسراييلي نژاده امريکايي ساګوي ډيکل چن، اسراييلي نژاده روسی ساشا تروپانوف او اسراييلي نژاده ارجنټاينی ياير هورن شامل دي.
دا د جنوري پر ۱۹مه د اوربند له پیل راهیسې د بندیانو لپاره د یرغمل شویو کسانو شپږمه تبادله ده.
په دې موده کې اتلس یرغمل شوي او له ۵۵۰ څخه ډیر فلسطیني بندیان وار له مخه خوشې شوي دي.
