پاکستان د درو هېوادونو د لوبډلو ترمینځ د یو ورځني کرکټ په وروستۍ سیالۍ کې جنوبي افریقا ته په شپږو وېکټو په ماتې ورکولو د لوبلړۍ پایلوبې ته لاره موندلې ده.
د فبرورۍ پر ۱۲مه د کراچۍ په ملي لوبغالي کې د سیالۍ پچه جنوبي افریقا وګټله او لومړی یې توپوهنه وکړه.
جنوبي افریقا په ټاکلیو ۵۰ اوورونو کې د پینځو لوبغاړو په سوځېدو ۳۵۲ منډې وکړې. هېنریک کلاسن ۸۷، میتیو بریټزکې ۸۳ او ټېمبا بووما ۸۲ منډې وکړې.
د کوربه پاکستان شاهین شاه اپرېدي دوه او خوشدل شاه او نسیم شاه یوه، یوه وېکټه واخیسته.
په ځواب کې د پاکستان لوبډلې چټکه توپوهنه وکړه خو تر ۱۱م اوور پورې یې چې د ۹۱ په مجموعي منډو درې لوبغاړي وسوځېدل نو لوبډله له مشکل سره مخامخ شوه. خو محمد رضوان او سلمان علي اغا تر دې وروسته بیټېنګ ته دوام ورکړ او د لوبډلې بریا یې باوري کړه. اغا ۱۳۴ او رضوان ۱۲۲ منډې وکړې.
پاکستان ټاکلی هدف په ۴۹ اوورونو کې پوره کړ.
ټاکل شوې چې پاکستان او نیو زیلینډ د فبرورۍ پر ۱۴مه د لوبلړۍ په پایلوبه کې یو بل ته مخامخ شي.
دا سیالۍ په داسې حال کې کېږي چې د فبرورۍ له ۱۹مې څخه د پاکستان په کوربه توب د اتلانو جام یا چیمپیینز ټرافۍ په نوم ۵۰ اووره سیالۍ پیلېږي چې پکې اته غوره لوبډلې برخه اخلي.
