د امريکا ولسمشر ډانلډ ټرمپ وايي باور لري چې د ایران د ايټمي پروګرام په اړه يو جوړجاړی کېدلی شي ځکه چې په وينا یې تهران غواړي د مذاکراتو په کولو سره د داسې ترېنګلتيا د زیاتېدو مخنیوی وشي چې پوځي کاروايي ته پکې ضرورت پېښيږي.
ولسمشر ټرمپ د فرورۍ پر لسمه له فاکس نيوز سره په يوه مرکه کې وويل چې "ایراني چارواکي د جوړجاړي د نه کولو له پايلو اندېښمن او ويريدلي" دي.
هغه زیاته کړه چې هر څوک فکر کوي چې اسراييل به د واشنګټن په مرسته یا تاييد د ايران د ځپلو لپاره حمله وکړي خو په وينا یې چې هغه دا کار نه غواړي او تهران به يو جوړجاړی کول خوښ کړي.
ده وویل، "زه هم غواړم چې پر هغوی د بمونو غورځولو پر ځای، ورسره يو جوړجاړي ته ورسو."
ټرمپ دا خبره تر هغې څو ساعته وروسته وکړه چې د ایران ولسمشر مسعود پزشکيان د مذاکراتو د هڅو لپاره د امريکا پر اخلاص شک وښود.
يوه اونۍ مخکې، د ايران ستر مذهبي مشر ايت الله علي خمينايي له امريکې سره د ايټمي پروګرام په اړه د مذاکراتو امکان رد کړی وو او ویلي یې وو چې دا به د تهران مشکلات حل نه کړي.
