نیو زیلینډ د درو هېوادونو د لوبډلو ترمینځ د یو ورځني کرکټ په لومړۍ سیالۍ کې پاکستان ته په ۷۸ منډو ماتې ورکړه.
د فبرورۍ پر اتمه د لاهور په قذافي لوبغالي کې د لومړۍ سیالۍ پچه نیو زیلینډ وګټله او لومړی یې توپوهنه وکړه.
نیو زیلینډ په ټاکلیو ۵۰ اوورونو کې د شپږو لوبغاړو په سوځېدو ۳۳۰ منډې وکړې. ګلېن فېلېپس ۱۰۶، ډیرېل مېچل ۸۱ او کېن وېلییمسن ۵۸ منډې وکړې.
د کوربه پاکستان شاهین شاه اپرېدي درې او ابرار احمد دوه وېکټې واخیستې.
په ځواب کې د پاکستان نهه لوبغاړي په ۴۷ اوورونو کې په ۲۵۲ منډو وسوځېدل او حارث رووف د ژوبلېدو له وجې بیټنګ و نه کړ او پاکستان سیالي وبایلله.
فخر زمان ۸۴، سلمان علي اغا ۴۱ او طیب طاهر ۳۰ منډې وکړې. د نیو زیلینډ مېچل سینټنر او میټ هېنري درې، درې او مایکل برېسوېل دوه لوبغاړي وسوځول.
ټاکل شوې چې د درې اړخیزه لوبلړۍ دویمه سیالي د فبرورۍ پر ۱۰مه د جنوبي افریقا او نیو زیلینډ ترمینځ وشي. په قذافي لوبغالي کې لوبه د پېښور پر وخت سهار پر نهه نیمو او د کابل پر نهو بجو پیلېږي.
تر دې وروسته به درېیمه سیالي د پاکستان او جنوبي افریقا ترمینځ کېږي او بیا به دوه غوره لوبډلې د فبرورۍ پر ۱۴مه د لوبلړۍ په پایلوبه کې یو بل ته مخامخې شي.
دا سیالۍ په داسې حال کې کېږي چې د فبرورۍ له ۱۹مې څخه د پاکستان په کوربه توب د اتلانو جام یا چیمپیینز ټرافۍ په نوم ۵۰ اووره سیالۍ پیلېږي چې پکې اته غوره لوبډلې برخه اخلي.
