په مونټېنېګرو کې زرګونو خلکو د هغو ۱۳ کسانو د وژنې پرضد لاريون کړی چې د جنورۍ پر لومړۍ نېټه د هغه هېواد په څېتیني ښار کې وژل شوي ول.
د جنورۍ پر ۱۶مه په سرښار پودګوريڅا کې احتجاج کوونکو د هغې پېښې پر وړاندې د حکومت د "ناکافي غبرګون" په اړه اعتراض وکړ او د لوړپوړو امنیتي چارواکو د استعفا غوښتنه يې وکړه.
هغوی وویل چې پېښه د مونټېنېګرو د "مات شوي نظام" او د چارواکو د "غیر ذمه وارانه" کړنو پایله وه.
د لاريون ګډونوالو د وسلو د ضبطولو، د وسلو د جوازونو ترلاسه کولو لپاره د سختو مقرراتو او په ښوونځیو کې د لازمي مضمون په توګه د مدني زدکړو د بیا معرفي کولو غوښتنه هم وکړه.
دا تر هغه وروسته ده چې د جنورۍ پر لومړۍ نېټه له څېتیني ښار سره نېږدې په یوه کلیواله سیمه کې د الېکساندر مارتینووېچ په نوم یو ۴۵ کلن سړي د رستوران په استقبالیه کې تر لفظې شخړې وروسته ډزې وکړې چې پکې د رستوران مالک، د هغه ماشومان او د بریدګر د خپلې کورنۍ غړي هم ووژل شول. وروسته چې پولیسو هغه تقیباوه نو خپل ځان یې هم وويشت او روغتون ته پر لاره ومړ.
حکومت د هغې پېښې په غبرګون کې درې ورځنۍ ماتم اعلان کړی وو.
مونټېنېګرو د سویل ختیځې اروپا په بالکان سیمه کې یو کوچنی هېواد دی چې له سربیا، کوسوو، البانیا، بوسنیا هرڅوګووینا او کروېشیا سره پولې لري.
