د پنجاب د خوشاب ضلعې په يو رود کې د کښتې ډوبېدو په پېښه کې شپږ ماشومان وژل شوي او څلور ژغورل شوي دي.
په پنجاب کې د طبیعي یا قدرتي ناورینونو پر وړاندې د نظم ادارې (پي ډي اېم اې) وياند مظهر حسین د جولای ۱۶مې تر پېښې وروسته مشال راډيو ته وويل چې کښتۍ د خوشاب د نورپور تل تحصيل په رود کې ډوبه شوه چې له امله يې له ۱۴ کلونو څخه تر ۱۶ کلونو عمر لرونکي ۱۰ ماشومان په اوبو کې ډوب شول.
هغه وویل، د ژغورونکو ډلو د ګړنديو عملياتو په نتيجه کې څلور ماشومان ژوندي ايستل شوي او شپږ ماشومان ورک دي چې دوی مړه اعلان کړي، خو د جسدونو لټون یې دوام لري.
د پي ډي اېم اې مشر عرفان علي کاټيا ويلي چې د هغو کسانو پرضد به قانوني کاروايي کوي چې له ژوند ژغورونکو واسکټونو پرته يې ماشومان په کښتۍ کې لېږدول.
تر دې مخکې د جولای پر ۱۴مه په خيبر پښتونخوا کې د ژغورنې او مرستندويه چارو ادارې چارواکو مشال راډيو ته ويلي ول چې په تېرو دوو میاشتو کې د سوات په سيند کې ۳۲ کسان ډوب شوي او مړه شوي دي چې ښځې او ماشومان هم پکې شامل دي.
په پاکستان کې په سيندونو يا رودونو کې د بې احتياطۍ، د زړو کښتيو چلولو يا په کښتيو کې له حده د زياتو کسانو د کښېنولو له امله دا ډول پېښې کېږي.
