Дар чанд ҷумла
Мақомот мегӯянд, сармоягузории хориҷӣ дар Тоҷикистон бисёр зиёд шудааст
Мақомоти расмии Тоҷикистон мегӯянд, соли гузашта ба кишвар тақрибан 5 миллиард доллар сармояи хориҷӣ ворид шудааст, ки ҳаҷми бисёр бузург аст.
Раҳбарони кумитаи давлатии сармоягузорӣ рӯзи 11-уми сентябр дар нишасти хабарие дар Душанбе гуфтаанд, ки сармоягузории хориҷӣ дар муқоиса ба соли 2023 бештар аз 72 дар сад зиёд шудааст. Ду сол пеш ба иқтисоди Тоҷикистон аз хориҷ бештар аз 2 миллиард доллар сармоя ворид шудааст. Дар ин бора хабаргузории давлатии "Ховар" гузориш додааст.
Дар ин миён сармояҳои мустақими хориҷӣ асосан аз Чин бештар аз 150 миллион доллар, аз Амрико тақрибан 119 миллион доллар ва сипас аз Бритониёву Русияву Қазоқистон ва кишварҳои дигар будааст. Пули хориҷӣ ба Тоҷикистон бештар барои коркарди ашё, истихроҷ, бонкдориву тиҷорату сохтмон ворид шудааст.
Тоҷикистон пайваста барои фазои номуносиби сармоягузорӣ, бахусус тамаъҷӯӣ аз ширкатҳову ришвахорӣ ва молиёти зиёд танқид мешавад ва мақомоти Кумитаи сармоягузорӣ гуфтаанд, ки аз авлавиятҳои корашон имсол беҳтар кардани фазо ва ҷалби сармояи бештари хориҷӣ будааст.
Сафири Саудӣ: "Ҳангоми Ҷоми Ҷаҳонии Футбол ҳам истеъмоли шароб манъ аст"
Холид Бандар ал-Сауд, сафири Арабистони Саудӣ дар Бритониё гуфтааст, ҳангоми баргузории Ҷоми ҷаҳонии футбол дар соли 2034 дар кишвараш мухлисон иҷозаи нӯшидани шароб ва ё ҳар нӯшокии спиртии дигарро нахоҳанд дошт.
Онҳое, ки ба дидани яке аз мусобиқоти сертамошобини дунё мераванд, иҷоза надоранд, дар ҳеч куҷо, аз ҷумла меҳмонхонаву ресторан ва майдонҳои футбол машруботро бинӯшанд. Баръакси Қатар, ки ба сайёҳон иҷоза медиҳад, дар ҷойҳои махсус машрубот бинӯшанд, Арабистони Саудӣ кишварест, ки истеъмоли машруботро комилан манъ кардааст.
Холид Бандар ал-Сауд гуфтааст: “Айни замон мо нӯшидани машруботро иҷоза намедиҳем, чун бе машрубот ҳам шодиву хурсандӣ кардан ҳам мумкин аст.”
Моҳи декабри соли гузашта Арабистони Саудиро бо як қарори баҳсбарангез мизбони Ҷоми Ҷаҳонии Футбол дар соли 2034 интихоб карданд, чун нигарониҳо аз риояти ҳуқуқи инсон дар ин кишвари муҳофизакор зиёд аст.
Дар Чин ақди никоҳ ба ҳадде кам шудааст, ки...
Теъдоди ҷуфтҳое, ки дар Чин соли гузашта ақди никоҳи расмӣ бастаанд, дар муқоиса ба соли 2023 бист дар сад камтар шудааст, ки поинтарин сатҳ аз замони сабти алоҳидаи ин омор дар кишвар будааст.
Дар ин бора нашрияи “Гордиан” бо такя ба омори идораҳои расмии Ҷумҳурии Мардумии Чин хабар додааст. Соли 2023 дар Чин 7 миллиону 700 ҳазор ақди никоҳи расмӣ бастаанд, вале ин рақам соли гузашта то 6.1 миллион поин омадааст.
Аз соли 1986 то кунун чунин омори поин сабт нашуда будааст. Айни замон соли гузашта 2.6 миллион ҷуфт барои ҷудо шудан ариза додаанд, ки 1.1 дар сад бештар аз соли 2023 аст. Ҷумҳурии Мардумии Чин дуввумин кишвари сераҳолии ҷаҳон аст.
Даҳсолаҳо боз мақомот бо сиёсати сахтгиронае намегузоштанд, ки оилаҳо на бештар аз як фарзанд дошта бошанд ва маҳдудиятҳо сабаби он шудааст, ки мардуми камтаре ба синни издивоҷ расидаанд ва ё ба издивоҷ майл надоранд.
Гузашта аз ин аҳолии Чин пир мешавад, ки ба ояндаи иқтисоди кишвар хатари зиёд дорад. Бо вуҷуди тағйири сиёсат ва ташвиқи мардум ба издивоҷу соҳиби фарзанд шудан, ҷавонони Чин солҳои ахир камтар издивоҷ мекунанд, чун зиндагӣ қимат мешавад ва кор ҳам кам аст.
Вазир гуфт, бозгардонидани тоҷикон аз Сурияву Ироқ масъалаи муҳим аст
Сироҷиддин Муҳриддин, вазири умури хориҷии Тоҷикистон гуфт, бозгардонидани шаҳрвандони кишвар аз гӯшаҳои ҷангзадаи ҷаҳон ва ҳамоиши онҳо ба зиндагии оддӣ як масъалаи муҳим барои ҳукумат ба ҳисоб меравад.
Ӯ рӯзи 11-уми феврал дар нишасти хабарие дар Душанбе гуфт, то кунун 381 шаҳрванди Тоҷикистонро аз Сурияву Ироқ ба кишвар баргардондаанд ва дар вақти мусоид ба ин кор идома медиҳанд.
Сироҷиддини Муҳриддин гуфт: “Мо ният дорем, тамоми он шаҳрвандони худро, ки хоҳиши бозгашт доранд, аз урдӯгоҳҳо ба ватан баргардонем. Баъди онки вазъ дар минтақа ором шавад, комиссияи ҳукуматӣ корро сари ин масъала аз нав оғоз мекунад.”
Баъди зуҳури ДОИШ ва ишғоли қаламравҳои васеи Ироқу Сурия аз тарафи ҷангҷӯёни он садҳо ҷавони тоҷик ба сафи ин гурӯҳи террористӣ пайваста ва зану фарзандони худро ҳам бо худ ба онҷо бурданд. Теъдоди зиёде аз он ҷангҷӯён куштаву беному нишон шудаанд ва қисмате аз зану фарзандони онҳо ҳанӯз дар урдӯгоҳҳои Сурияву Ироқ мондаанд.
Соли гузашта дар Тоҷикистон одамкушӣ зиёд шудааст
Мақомоти интизомии Тоҷикистон гуфтанд, қатлу куштор, яке аз ҷиноятҳои мудҳиш дар кишвар соли 2024 ба таври чашмгир афзоиш ёфтааст.
Дар баёнияи расмӣ, ки вазорати корҳои дохилӣ, ки рӯзи 13-уми феврал нашр кард, омадааст, соли гузашта дар Тоҷикистон 75 мавриди одамкушӣ ва қасди одамкушӣ сабт шудааст, ки дар муқоиса ба соли 2023-ум 18 маврид бештар аст. Соли 2023 дар Тоҷикистон 57 нафарро куштаанд ва ё ба ҷонашон сӯиқасд кардаанд. Соли 2022 дар кишвар 58 мавриди қатл ва сӯиқасд ба ҷони инсон сабт шудааст.
Дар баёнияи вазорати корҳои дохилӣ дар бораи сабабҳои афзоиши якбораи ин ҷинояти сангин чизе нагуфтаанд, аммо зоҳиран қатлҳои пайваста дар шаҳри Конибодом дар соли 2024 сабаби зиёд шудани омори нохушоянд барои ҷомеа ва ҳам дардисарсоз барои мақомоти интизомии Тоҷикистон шудааст. Дар ин сол 23 узви 7 хонаводаро дар Конибодом бераҳмона куштанд ва то кунун таҳқиқи ин ҷиноятҳо идома дорад.
Русия аз Чехия хост, ки Фаридаро истирдод кунад
Муфаттишон дар шаҳри Қазони Русия ба хонаи волидони Фарида Қурбонгалеева, хабарнигори мустақили муқими Чехия рафтаанд. Русия аз Чехия талаб дорад, ки ӯро ба Маскав истирдод кунанд.
Қурбонгалеева рӯзи 13-уми феврал дар саҳифааш дар Фейсбук навишт, ки муфаттишон ба волидонаш дар бораи ӯ саволҳо доданд.
“Мухтасар гӯям, - навишт Фарида, - аз падару модарам пурсиданд, ки чӣ гуна ман ҷинояткори сатҳи олӣ шудаам”. Аз ин пеш ӯ навишт, ки ходимони пулиси Чехия ба дасти ӯ номае супурданд, ки дар он талаби истирдоди ӯ аз Прага ба Маскав карда шудааст.
Қарор аст ин талабро Додгоҳи шаҳри Прага дар ҷаласа муҳокима намояд. Қурбонгалеева гуфт, ки як вакили дифоъ розӣ шуд, аз ҳуқуқи ӯ ройгон дифоъ кунад.
Фарида Қурбонгалееваро моҳи июни соли 2024 додгоҳе дар Русия дар ғайбаш барои нашри хабарҳои “дурӯғин” дар бораи артиш ва даъват ба терроризм ба ҳабс гирифт. Аз ин пеш исми ӯро ба феҳристи “агентҳои хориҷӣ” ва “террористу ифротгароҳо” ворид карданд.
Фарида Қурбонгалеева зодаи шаҳри Қазони Тотористон аст. Баъди солҳо кораш дар телевизиони давлатии Тотористон, дар шабакаи давлатии “Россия-1” барандаи барномаҳои хабарию иттилоотии “Вести” буд.
Баъди ишғоли Қрим аз ҷониби Русия дар соли 2014 Қурбонгалеева ихтиёран кор дар телевизиони давлатиро тарк карда ба Прага кӯчид ва солҳои 2018-2021 дар телевизиони "Настоящее время" чун барандаи барномаҳои хабарӣ кор кард.
Муовини Трамп аз эҳтимоли тадбирҳои нави фишор ба Русия гуфт
Ҷей Ди Венс, муовини президенти ИМА гуфт, агар президенти Русия Владимир Путин барои созиши сулҳ ва замонатҳои давомдор барои Украина розӣ нашавад, Вашингтон метавонад зидди Маскав таҳрим ҷорӣ карда иқдоми низомие ба кор барад.
Нашрияи The Wall Street Journal бо такя ба мусоҳибаи ихтисосии Венс рӯзи 14 феврал навишт, “василаҳои иқтисодӣ ва ҳам, бешубҳа, василаҳои ҳарбии таъсиргузор ҳам ҳаст, ки аз он ИМА метавонад зидди Путин истифода кунад”.
Ӯ таъкид намуд, ки Вашингтон дар ҳақи истиқлолият ва соҳибихтиёрии Украина андеша мекунад. Айни замон, Венс гуфт, дар робита бо Украина имкони дастёбӣ ба созише ҳам вуҷуд дорад, ки ба гуфтаи ӯ, “бисёриҳоро дар ҳайрат хоҳад гузошт”.
Инчунин муовини президенти Амрико ишора кард, ки Доналд Трамп вобаста ба шеваи музокирот метавонад тарзи бархӯрдашро дигар кунад. Қарор аст рӯзи ҷумъа, 14-уми феврал Ҷей Ди Венс дар Мюнҳен бо президенти Украина Владимир Зеленский дидор ва гуфтугӯ кунад.
Рӯзи 12 феврал Трамп гуфт, ки бо президентони Русия ва Украина телефонӣ суҳбат кард ва ба зердастонаш дастур дод, ки барои шурӯи музокирот ба хотири хатми ҷанг дар Украина омода шаванд.
Даҳҳо мансабдор бо гумони дуздии 120 млн сомонии сарбозони тоҷик ҷавобгар шудаанд
Оҷонсии мубориза бо фасод дар Тоҷикистон парвандаи 78 нафар мансабдорро барои тасарруфи беш аз 120 миллион сомонии Вазорати дифои кишвар ба додгоҳ фиристодааст.
Пештар ин ниҳод гуфта буд, ки барои ин ҷиноят 52 масъули Вазорати дифоъ ва дигар идораҳои муҳими давлатӣ боздошт шуда, тафтиши қисме аз парвандаҳо идома дорад. Оҷонсӣ дар бораи шахсияти боздоштшудаҳо чизе нагуфт. Мавқеи онҳо ё вакилони мудофеяшон низ ба иттиҳомот маълум нест.
Сулаймон Султонзода, раиси Оҷонсии мубориз бо фасод рӯзи 14-уми феврал дар нишасти хабарӣ гуфт, “аз зарари расонидашуда тахминан 107,8 миллион сомонияш ба буҷети давлат барқарор карда шуд, вобаста ба 14,8 миллион сомонӣ барои барқарар кардани зарар аризаи даъвоӣ ба судҳо пешниҳод гардид.”
“Дар инҷо 43 нафар аз ҳисоби кормандони Вазорати мудофиа, 3 нафар аз Кумитаи давлатии амнияти миллӣ, 2 нафар аз Вазорати молия боз аз дигар вазорату сохторҳои дигар ҳам дар ҳамин парвандаи ҷиноятӣ ҳамиштирок буданд,”--афзуд ӯ.
Оҷонсии мубориза бо фасод хабари дуздиву аз худ кардани даҳҳо миллион сомонӣ аз Вазорати дифоъро моҳи феврали соли гузшта тасдиқ карда буд.
Пулеро, ки бояд барои либосу хӯроку нигоҳубини сарбозон ва барои муҳофизати амнияти кишвар сарф мешуд, ба гуфтаи мақомот, бо мусоидати чанде аз масъулон тасарруф шудааст. Дилрабо Самадова, мудири созмони "Дафтари озодиҳои шаҳрвандӣ" қаблан ба Радиои Озодӣ гуфта буд, ки чунин амал ба вазъу шароити қисмҳои ҳарбӣ таъсири манфӣ гузошта, дар ниҳоят ҷабри онро сарбозон мекашанд.
Созмони Шаффофияти Байнулмилал (Transparency International ) дар гузориши як соли пешаш гуфта буд, ки фасод дар Тоҷикистон расм шудааст. Ин созмон, ки меъёри фасод дар кишварҳои ҷаҳонро баҳогузорӣ мекунад, Тоҷикистонро як кишвари фасодзадатарини дунё номидааст.
Додгоҳи олӣ парвандаи ҳамла ба муфтиро шарҳ дод
Додгоҳи олии Тоҷикистон ҳукми се муттаҳам барои ҳамла ба муфтии кишварро шарҳ дод.
Рустам Мирзозода, раиси Додгоҳи олӣ 13-уми феврал дар нишасти хабарӣ гуфт, Муҳаммадрофеъ Иззатуллозода, фарде, ки ба раиси Шӯрои уламо ҳамла кард, ба 26 сол зиндон маҳкум шудааст.
Додгоҳ ин ҷавонро дар терроризм, тайёрӣ ва ба ҷиноят ва одамкушӣ гунаҳкор кардааст. Назари Иззатуллозода ва наздиконаш ба иттиҳом маълум нест.
Рӯшан нест, ки онҳо аз болои қарори додгоҳ ба зинаи болоӣ шикоят мебаранд ё не. Гуфта мешавад, ҷавони ҳамлагар 21-сола ва сокини шаҳри Норак аст.
Ба гуфтаи раиси Додгоҳи олӣ, Муҳаммадҷон Шодихонов, гумонбари дигар бо иттиҳомҳои терроризм ва шарикӣ дар ҷиноят ба 13 сол зиндон маҳкум шудааст.
Раиси Додгоҳи олӣ афзуд, Шодихонов ҳарчанд дар тарҳрезии ҳамла ба Сайидмукаррам Абдулқодирзода даст дошт, аммо дар лаҳзаи ҳамла ба муфтӣ дар ҷойи ҳодиса набуд.
Дар Додгоҳи олӣ гуфтанд, гумонбари севвум Қиёмиддин Файзуллоев барои хабар надодан дар бораи ин ҷиноят, 2 сол аз озодӣ маҳрум шудааст.
Рӯзи 11-уми сентябри соли гузашта дар дохили Масҷиди марказии шаҳри Душанбе ва дар байни намозгузорон ба муфтии Тоҷикистон бо корд дарафтода, пешонии ӯро захмӣ карда буд.
Вазорати корҳои дохилии Тоҷикистон он замон ҳодисаро “авбошӣ” номид, вале баъдан худи муфтӣ онро кори дасти “гурӯҳҳои ифротӣ” хонд.
Ин ҳодиса вокунишҳои зиёдро дар шабакаҳои иҷтимоӣ ба миён овард.
Ҳамла ба Абдулқодирзода замоне рух дод, ки шарҳу паёмҳои ситезаҷӯёнаи зидди ӯ, махсусан пас аз ҳимояташ аз фишори мақомот ба ҳиҷоби исломӣ, ба авҷ расида буд.
Абдулқодирзода 61 сол дорад ва 14 соли охир раиси Шӯрои уламои Маркази исломӣ, ягона ниҳоди содиркунандаи фатво дар Тоҷикистон, аст.
Ӯ дар тӯли кораш дар ин мақом, ки зоҳиран ҷамъиятӣ, вале зери назорату итоати дастгоҳҳои давлатист, борҳо аз минбари масҷид алайҳи гурӯҳҳои ифротӣ сухан ва ба ҳимоят аз ҳукумати Эмомалӣ Раҳмон даъват кардааст.
Мухолифон ӯ ва ниҳоди зери раҳбарияшро барои сукут дар баробари мушкили диндорон, аз ҷумла ташкили масҷидҳову пӯшиши мазҳабӣ ва гузоштани ришу аз минбарҳо дур кардани рӯҳониёни шинохта танқид карда, баъзе аз гурӯҳҳои ифротгаро ба воситаи интернет ба ӯ таҳдид намуда буданд.
Кумитаи андоз номи қарздорони калонро эълон кард
Кумитаи андози Тоҷикистон рӯйхати калонтарин қарздорҳо аз молиётро эълон кард.
Нусратулло Давлатзода, раиси ин ниҳод 13-уми феврал дар ҳузури хабарнигорон гуфт, аз ҳама зиёд Шабакаҳои тақсимоти барқ аз молиёт қарздор аст ва вомаш ба 177 миллион сомонӣ расидааст. Баъд аз Шабакаҳои тақсимоти барқ, калонтарин қарздорҳо аз андоз ин корхонаҳо будаанд:
Корхонаҳои зертобеи Оҷонсии беҳдошти замин 81 миллион сомонӣ,
Корхонаҳои зертобеи Идораи манзилию комунналӣ 32,6 миллион сомонӣ,
Неругоҳи "Сангтӯда-1" 26 миллион сомонӣ,
Кони Яғноб 11 миллион сомонӣ,
ҶСП “Алюминсохтмон” 9,9 миллион сомонӣ.
Раиси Кумитаи андоз мегӯяд, ин корхонаҳо дар умум аз молиёт қариб 400 миллион сомонӣ қарздор ҳастанд. Ин маблағ 52 дарсади маблағи умумии бақияи қарзи андозро ташкил медиҳад.
“Ин соҳаҳо мушкилоти худро доранд, мо корбарӣ мекунем,”-афзуд раиси Кумитаи андоз.
Ба ҷуз “Сангтӯда-1”, ки моли Русия аст, дигар қарздорони калон аз молиёт, корхонаҳои давлатӣ ҳастанд.
Шеваи идоракунии корхонаҳои давлатӣ ва бо зарар кор кардану қарздор шудани онҳо, пештар танқидҳоеро ба миён оварда буд.
Боздошти як паноҳҷӯи афғон бо гумони захмӣ кардани 28 кас дар Мюнхен
Пулиси Олмон гуфт, бар асари ҳамлаи як мошин ба издиҳоми мардум дар шаҳри Мюнхен камаш 28 тан, аз ҷумла кӯдакон, захмӣ шудаанд.
Ҳодиса рӯзи 13-уми феврал рух дод.
Гумонзад як паноҳҷӯйи 24-солаи афғонистонӣ будааст.
Хабаргузории "Ассошиэйтед Пресс" навишт, ки ӯ боздошт шудааст ва таҳқиқи ҳодиса идома дорад.
Ин ҳамла дар ҳоле сурат гирифт, ки рӯзи 14-уми феврал "Нишасти амниятии Мюнхен" баргузор хоҳад шуд.
Дар нишаст намояндагони чанд кишвар, аз ҷумла Ҷей Ди Вэнс, муовини раисҷумҳури Амрико ва Владимир Зеленский, президенти Украина, ширкат хоҳанд кард.
Кушта шудани 1455 тоҷикистонӣ дар ҷанги се кишвар
Вазири корҳои дохилии Тоҷикистон гуфт, ки дар ҷанги Ироқ, Сурия ва Афғонистон 1455 шаҳрванди кишвар кушта шудаанд.
Рамазон Раҳимзода ин оморро рӯзи 13-уми феврал дар нишасти матбуотӣ эълон кард.
Вай гуфт, дар умум, 2566 зодаи Тоҷикистон дар ҷангҳои Ховари Миёна ва Афғонистон ширкат кардаанд, вале соли дақиқеро ба забон наовард.
Ҳузури шаҳрвандони Тоҷикистон дар ҷанги Ироқу Сурия аз замони зуҳури ДОИШ ё гурӯҳи террористии “Давлати исломӣ” дар соли 2014 сар шудааст.
Тоҷикистон дар панҷ соли охир наздик ба чорсад зану кӯдаки ҷангҷӯёнро аз Сурияву Ироқ ба ватан баргардонд ва ҳанӯз ҳам теъдоди дигаре дар паноҳгоҳи “Ал Ҳавл”-и Сурия мондаанд.
Вазири тоҷик аз баёнияҳои муҳоҷирситезона дар Русия изҳори нигаронӣ кард
Вазири корҳои хориҷии Тоҷикистон гуфт, баёнияҳои муҳоҷирситезонаи теъдоде аз вакилон ва сиёсатмадорони рус мояи нигаронӣ аст ва боиси изтироб дар ҷомеаи Тоҷикистон мешавад.
Сироҷиддин Муҳриддин рӯзи 13-уми феврал дар нишасти хабарии муштарак бо ҳамтои русаш Сергей Лавров амалиёти мақомоти интизомии Русияро ба зидди муҳоҷирони тоҷик низ танқид кард.
"Амалиёт ба зидди муҳоҷирон гоҳо бо шеваҳои сахте сурат мегиранд. Мо чорабиниҳои мақомоти Русияро барои ба чаҳорчӯбаи қонунӣ ворид кардани муҳоҷират зери суол намебарем, вале ин чорабиниҳо набояд сабаби изтироб дар ҷомеа ва фазои иттилоотӣ бишаванд," – гуфт Сироҷиддин Муҳриддин дар Маскав.
Бадрафторӣ бо муҳоҷирони тоҷик дар Русия бахусус баъд аз ҳамлаи маргбор ба толори консертии "Крокус" дар моҳи март бисёр зиёд шуд. Баъди ҳамин ҳодиса аз Русия бештар аз 17 ҳазор муҳоҷири тоҷикро ихроҷ карданд.
Матбуоти Русия ва гоҳе сиёсатмадорони он муҳоҷирони корӣ ва аз ҷумла муҳоҷирони тоҷикро сабаби тамоми бадбахтиҳои кишварашон меноманд.
Бино ба омори расмӣ, танҳо дар нимаи соли 2024 аз Тоҷикистон тақрибан 393 ҳазор нафар барои кор ба хориҷ ва аксаран ба Русия рафтаанд.
"Украина бояд як бахши музокироти сулҳ бошад"
Роҳбарони баъзе аз кишварҳои аврупоӣ бо нашри баёнияе пойбандии худро ба истиқлол ва тамомияти арзии Украина таъкид карданд.
Намояндагони Фаронса, Олмон, Бритониё, Лаҳистон, Испания, Итолиё ва Кумисюни Аврупо рӯзи 12-уми феврал гуфтанд, "дар ҳама гуна музокира бо Русия, Аврупо ва Украина низ бояд нақш дошта бошанд".
"Мо як ҳадаф дорем: идомаи пуштибонӣ аз Украина то расидан ба сулҳи одилона, ҳамаҷониба ва пойдор," – гуфта шудааст дар баёния.
Олаф Шолтс, садри аъзами Олмон, дар мусоҳибае бо нашрияи Politico гуфт, ки наметавон сулҳро ба Украина таҳмил кард. Ин мусоҳиба рӯзи 13-уми феврал нашр шуд.
Изҳороти раҳбарони аврупоӣ дар ҳолест, ки президенти Амрико Доналд Трамп рӯзи 12-уми феврал бо раҳбарони Русия ва Украина дурнамои хатми ҷанг дар Украинаро баррасӣ кард.
Ӯ изҳори умед кард, ки ин фоҷеа ба зудтарин фурсат хотима меёбад.
"15 парвандаи ҷиноӣ дорад." ВКД боздошти "Боим"-ро тасдиқ кард
Намояндагони Вазорати корҳои дохилӣ боздошт ва истирдоди Иброҳим Сафаров, машҳур бо лақаби "Боим"-ро аз Туркия ба Тоҷикистон тасдиқ карданд. Радиои Озодӣ дар ин бора дар аввали моҳи декабри соли 2024 хабар дода буд.
Рамазон Раҳимзода, вазири корҳои дохилӣ, рӯзи 13-уми феврал дар нишасти матбуотӣ гуфт, Иброҳим Сафарови 53-сола аз рӯйи 15 парвандаи ҷиноӣ таҳти ҷустуҷӯй қарор дошт.
"Ҳамаи парвандаҳо барои ба муомилот баровардани маводи мухаддир. Пештар дар Русия барои ин ҷиноят ба ҷавобгарӣ кашида шуда буд. Ҳоло дар Истанбули Туркия дастгир ва ба Тоҷикистон оварда шудааст ва тафтиши парвандаҳояш идома дорад," – афзуд вазир.
Ҳарчанд Раҳимзода дар бораи парвандаҳои Иброҳим Сафаров ҷузъиёт надод, пештар манбаъҳои Радиои Озодӣ гуфта буданд, ки ӯ "ба таъсиси шабакаи фурӯши ҳабҳои экстазӣ" ва "нигаҳдории силоҳ айбдор мешавад". Мавқеи наздикон ё вакили мудофеаш ба иттиҳом маълум нест.
Исми Иброҳим Сафаров (Боим) дар гузашта низ борҳо бо интиқолу фурӯши миқдори бузурги маводи мухаддир расонаӣ шуда буд. Расонаҳои русӣ аз ӯ “Пабло Эскобари Тоҷик” ном мебурданд.
Вай, ки дар гузашта ба баргузории консерт ва таҳияи суруд ба сарояндагон мадад мекард, соли 2006 бо беш аз 200 кило ҳероин дар Русия боздошт ва ба нуздаҳ сол зиндон маҳкум шуд. Соли 2020 дар саҳифааш дар Фейсбук хабар дод, ки озод шудааст.
Вазорати корҳои дохилии Тоҷикистон дар соли 2024 дар умум нуҳ гурӯҳи созмонёфтаи ҷиноии иборат аз 42 нафарро боздошт кардааст, ки аз онҳо 280 кило маводи мухаддир гирифта шудааст.
