“Хӯрок мепухтам. Духтарам ба тарафи ҳоҷатхона рафт. Худро ба дор овехт.” Мафтуна, сокини шаҳри Душанбе, марги духтари 15-солааш Макнунаро дар тобистони соли 2024 чунин ба ёд овард. Ба иддаои ӯ, духтар дар пайи озори ҷинсӣ аз сӯйи падараш, Рустам Бедимоғов, худкушӣ кардааст. Додгоҳи ноҳияи Сино мардро сездаҳ сол зиндонӣ кард. Наздиконаш розӣ нестанд.
“Як рӯз духтарам гуфт, ки сар мешӯям. Падараш гуфт, исто, ман ба ҳаммом дароям, вале зуд баромад. Ҳамон вақт дурбини телефонро рӯшан гузоштааст. Духтарам 38 ё 48 дақиқа бо тани урён сар шустааст. Падараш пурра онро сабт карда, сипас тамошо мекунад,” – ба нақлаш идома дод Мафтуна.
Ба қавли ин зан, пас аз тақрибан 12 рӯз падар ба духтараш иқрор шуда, ки ӯро ба навор гирифт ва гуё бо иръобу таҳдид “кӯшиши дастдарозӣ кардааст”.
“Духтарам гуфт, оча, дадаам маро дар телефон бо тани урён сабт кардааст. Телефонро гирифту нишон дод. Гуфтам, бачаҷон, биё ман ба падару модаркалонат мегӯям. Гуфт, маро шарманда накунед,” – афзуд зан.
Ин сокини шаҳри Душанбе мегӯяд, баъд аз зориву таваллои духтараш тасмим гирифт, ки қазияро овоза накунад ва аз хонаи шавҳар бе ҷанҷол баромада раваду баъд ба додгоҳ шикоят барад. Фурсат нашуд, чун баъди ду рӯзи сӯҳбат духтар худкушӣ кардааст.
Додгоҳи ноҳияи Синои шаҳри Душанбе дар моҳи октябри соли гузашта падари хонадон Рустам Бедимоғовро 13 сол зиндонӣ кард. Вайро барои ба худкушӣ расондан ва ҳаракатҳои бадахлоқона нисбат ба ноболиғ гунаҳкор донистаанд.
Вакили мудофеи ӯ дар ариза барои бозбинии парванда гуфтааст, зерҳимояаш “худро қисман айбдор медонад”, аммо бо гуноҳи дувум, яъне кӯшиши дастдарозӣ ба духтар розӣ нест. Бедиғомов ба наздиконаш ҳам гуфтааст, “ин тӯҳмат аст”.
Мавлуда Сайфиддинова, модари Рустам Бедимоғов, гуфт, “ин хел бача набуд. Ҷанг мекард, ҳақорат мекард, дар нияти дастдарозӣ набуд. Чӣ коре кард, ҳамон занак кард. Фақат мехост, ки ҳавлиро фурӯхта, ба бинои баландошёна раванд.”
Модари наврас мегӯяд, шавҳараш дар баёноти худ ба ин амалаш иқрор шуда буд. Ҳоло нигаронии Мафтуна аз он аст, ки бо гузашти моҳҳо аз иҷроӣ шудани ҳукм шавҳараш Рустам Бедимоғовро ҳанӯз дар Боздоштгоҳ нигоҳ медоранд. Вай ҳамзамон аз эҳтимоли сабук шудани ҳукми мард ташвиш дорад.
Ин зан мегӯяд, бо ду фарзанд ҳоло дар хонаи волидон қарор дорад ва муроҷиатҳояш барои гирифтани хонаи муштарак бо шавҳараш ҳам бенатиҷа аст. Наздикони мард, ки ба Мафтуна бовар надоранд, мегӯянд, агар иддаои ӯ рост аст, пас, чаро замони зинда будани духтараш қазияро ошкор накард ва шикоят набурд.
Равоншинос Шоҳсанам Қарабоева мегӯяд, зери фишору зӯроварӣ қарор доштани занон дар хона ва тарс аз бархӯрди нодурусти ҷомеа сабаби хомӯшии модарон дар чунин ҳолатҳо мешавад, ки дар ниҳоят пайомадаш бадфарҷом хоҳад буд.
“Агар шахси бегона даст ба чунин кор занад, зуд ба нозири минтақа ва додгоҳ муроҷиат мекунанд. Вақте ин ҳодиса дар худи оила мешавад, сирро нигоҳ медоранд. Урфу одатҳои мо ба ҳамин ҳолат оварда расонданд, ки ин духтар даст ба худкушӣ зад. Зан ҳаминро фикр карду нагуфт. Мумкин аст, зӯроварӣ аз тарафи шавҳараш буд, ки нагуфт," – шарҳ дод Шоҳсанам Қарабоева.
Бино ба омори Ваколатдори ҳуқуқи кӯдак, танҳо дар соли 2022 дар Тоҷикистон 60 кас барои озори ҷинсии наврасон ба зиндон маҳкум шуданд. Додгоҳ онҳоро ба дастдарозӣ ва озору азияти ҷинсӣ ба 52 ноболиғ гунаҳкор дониста, ҷазо додааст. Омори нав дастрас нест.
Равоншиносон мегӯянд, волидон бояд нисбат ба фарзандони худ бисёр ботаваҷҷӯҳ бошанд ва дар сурати дидани тағйирот дар рафтору кирдор ё канорагириву афсурдаҳолӣ бояд ҳатман роҳе ёфта, аз ҳоли онҳо огоҳ шаванд ва сари вақт чора андешанд, то ҷигарбанди худро аз даст надиҳанд.
