Glauk Konjufca në fjalimin para deputetëve.

Konjufca dështon ta bëjë Qeverinë, hapet rruga për zgjedhje

19 nëntor 2025

• Nënkryetari i Lëvizjes Vetëvendosje (LVV), Glauk Konjufca, nuk i siguroi votat e nevojshme për të formuar Qeverinë e re të Kosovës.

•Konjufca ishte figura e dytë e LVV-së, pas liderit të partisë, Albin Kurtit, që nuk i siguroi votat e nevojshme.

•Sipas Kushtetutës, presidentja e vendit, Vjosa Osmani, duhet t’i shpallë zgjedhjet e parakohshme.

• Më herët gjtë ditës, LVV-ja thirri një tjetër seancë për miratim të katër projektligjeve të rëndësishme për vendin - përfshirë buxhetin e shtetit për vitin e ardhshëm dhe marrëveshjet ndërkombëtare - por vota të mjaftueshme nuk pati.

• Kryetari i Kuvendit, Dimal Basha i mbylli diskutimet, por e la të hapur seancën, duke iu kërkuar deputetëve të PDK-së, LDK-së, AAK-së dhe Nismës, që të reflektojnë edhe të votojnë më vonë për to.

• Partitë ish-opozitare i bojkotuan diskutimet dhe e fajësuan LVV-në për humbjen potenciale të miliona eurove nga fondet e huaja.

• Kosova është me Qeveri në detyrë, në mungesë të një ekzekutivi të ri, pas zgjedhjeve parlamentare të 9 shkurtit.

15:38

Zemaj: LVV-ja mashtroi qytetarët duke thënë se i ka numrat

Pas përfundimit të seancës, deputeti i LDK-së, Armend Zemaj, tha se LVV-ja “i mashtroi qytetarët” duke thënë se i ka numrat për krijimin e institucioneve të reja.

“LVV-ja i ka mashtruar qytetarët se i kanë numrat. Nga zgjedhjet e shkurtit kanë deklaruar se e kanë një shumicë”, tha ai.

Zemaj tha se tani vendi po shkon drejt zgjedhjeve të jashtëzakonshme.

“Bëjmë thirrje për zgjedhje të lira, demokratike dhe pa ndërhyrje”, tha ai.

Deputeti Armend Zemaj. Fotografi nga arkivi.

15:35

Konjufca dështon ta bëjë Qeverinë

Mandatari Glauk Konjufca ka dështuar që ta formojë Qeverinë e re të Kosovës, pasi ekzekutivi i prezantuar nga ai mori vetëm 56 vota për, 53 votuan kundër dhe katër abstenuan.

Me dështimin e dytë për formimin e ekzekutivit, hapet rruga për zgjedhje të reja.

15:29

Haradinaj: LVV-ja do të shkojë në opozitë

Kreu i AAK-së, Ramush Haradinaj, kritikoi Konjufcën që nuk paraqiti një program qeveritar, duke theksuar se ai përmendi vetëm vitin 2026.

Ai tha se LVV-ja “do të shkojë në opozitë” pas zgjedhjeve të reja.

“Ju po shkoni në opozitë, Qeveria e re po vjen”, tha ai.

15:17

Lista Serbe thotë se s'ka votë për Qeverinë Konjufca

Igor Simiq nga Lista Serbe akuzoi LVV-në se ka shkelur të gjitha "rregullat" gjatë qeverisjes, duke theksuar se partia që ka nëntë deputetë nuk do të votojë për Qeverinë Konjufca.

Shfaq më shumë