Dimal Basha urohet për zgjedhjen në postin e kryetarit të Kuvendit të Kosovës.

Drejtpërdrejt Basha ndërpret seancën konstituive të Kuvendit të Kosovës në mungesë konsensusi për nënkryetarin serb

26 gusht 2025 E përditësuar 1 orë më herët

• Deputeti i Lëvizjes Vetëvendosje, Dimal Basha, është zgjedhur kryetar i Kuvendit të Kosovës të martën, duke marrë 73 vota.

• Kuvendi zgjodhi edhe tre nënkryetarë nga partitë shqiptare: Albulena Haxhiun, Vlora Çitakun dhe Kujtim Shalën.

• Emilija Rexhepi u zgjodh nënkryetare nga pakicat joserbe, ndërsa konstituimi ngeci te votimi i kandidatit për nënkryetar nga pakica serbe.

• Konstituimi i Kuvendit do t'i hapte rrugë formimit të Qeverisë së re, pas një ngërçi të gjatë politik, pas zgjedhjeve të 9 shkurtit.

Postim i ri

14:19

Zgjidhen tre nënkryetarët e Kuvendit nga partitë shqiptare

Albulena Haxhiu, Vlora Çitaku dhe Kujtim Shala janë zgjedhur nënkryetarë me vota 101 për, asnjë kundër dhe nëntë abstenime.

Dy nënkryetarë tjerë duhet të propozohen nga pakicat.

Nënkryetarja e re e Kuvendit të Kosovës, Vlora Çitaku. Foto nga arkivi.

14:16

Basha: Ka konsensus për votim në pako

Kryetari Basha ka thënë se tri partitë më të mëdha shqiptare janë pajtuar për t'i votuar tre nënkryetarët në pako.

Lëvizja Vetëvendosje e ka propozuar Albulena Haxhiun, Partia Demokratike e Kosovës e ka propozuar Vlora Çitakun, ndërsa Lidhja Demoratike e Kosovës e ka propozuar Kujtim Shalën.

14:13

Basha: Tetë abstenime, jo tre për zgjedhjen e kryetarit

Kryetari i sapozgjedhur i Kuvendit të Kosovës, Dimal Basha ka bërë të ditur se për kandidimin e tij kanë abstenuar tetë deputetë dhe jo tre, siç është thënë disa minuta më parë.

14:12

Seanca konstitutive vazhdon

Në sallën e Kuvendit kanë ardhur edhe deputetët e Lëvizjes Vetëvendosje.

Nuk dihet ende se kush do të propozohet për nënkryetar nga radhët e LVV-së, LDK-së dhe komunitetit serb.

Nga PDK-ja kanë thënë se do të propozojnë Vlora Çitakun, ndërsa nga radhët e komuniteteve joserbe pritet të propozohen Emilija Rexhepi, Fidan Jilta dhe Artan Asllani. Këta tre e ushtrojnë detyrën e nënkryetarit me rotacion.

Shfaq më shumë