Përgjigja e Kremlinit ndaj presidentit Biden
Rusia i është përgjigjur komenteve të presidentit amerikan, Joe Biden, se homologu i tij rus Vladimir Putin "nuk duhet të qëndrojë në pushtet".
"Nuk i takon zotit Biden të vendosë për këtë. Ajo çështje duhet të mbetet vetëm në zgjedhjen e popullit të Federatës Ruse," tha për CNN zëdhënësi i Kremlinit, Dmitry Peskov.
Biden: Lufta në Ukrainë nuk mbaron shpejt
Në përmbyllje të vizitës së tij dyditore në Poloni, presidenti i Shteteve të Bashkuara të Amerikës, Joe Biden, tha se Ukraina nuk duhet të frikësohet pasi që nuk do të jetë e vetme në luftën e saj.
Biden tha se presidenti rus, Vladimir Putin, ka përdorur gënjeshtra si justifikime për të pushtuar Ukrainën. Duke ushtruar agresion mbi Ukrainën, Biden tha se Rusia, ka mbytur demokracinë.
“Në këtë betejë ne duhet t’i kemi sytë hapur. Kjo betejë nuk do të fitohet as për disa ditë e as për disa muaj. Ne duhet të forcojmë veten për luftën e gjatë përpara nesh”, tha Biden në fjalimin e tij.
Tjetër sulm në Lviv
Kryetari i bashkisë së Lvivit, Andriy Sadovyi tha se një tjetër sulm ka goditur qytetin perëndimor të Ukrainës.
“Si rezultat i sulmeve të reja me raketa në Lviv, dëme të konsiderueshme u shkaktuan në objektet e infrastrukturës. Banesat nuk janë dëmtuar. Vazhdon shuarja e zjarrit. Shërbimet përkatëse po punojnë në terren”, ka shkruar para pak minutash Sadovyi në një postim në Twitter.
Lviv, është qytet pranë kufirit me Poloninë. Polonia është anëtare e NATO-s. Në Varshavë të Polonisë, aktualisht për vizitë është presidenti amerikan, Joe Biden.
Të nderuar lexues ne po vazhdojmë të mbulojmë drejtpërdrejt luftën në Ukrainë. Më poshtë po ju sjellim disa nga ngjarjet kryesore të ditës.
- Presidenti amerikan, Joe Biden, e cilëson ‘kasap’ presidentin e Rusisë, Vladimir Putin. Këtë koment Biden e bëri pas vizitës që iu bëri disa refugjatëve ukrainas në Varshavë të Polonisë.
- Rusia sulmoi një rafineri të naftës në qytetin perëndimor të Ukrainës, Lviv. Ky qytet ndodhet pranë Polonisë. Në sulm u lënduan pesë persona, njoftuan autoritetet ukrainase.
- Presidenti i Shteteve të Bashkuara të Amerikës, Joe Biden, u takua të shtunën në Varshavë me dy ministra ukrainas në bisedimet e para ballë për ballë midis presidentit amerikan dhe zyrtarëve të lartë të Kievit që nga fillimi i pushtimit rus.
- Kryetari i bashkisë së kryeqytetit të Ukrainës, Kiev, të shtunën anuloi një shtetrrethim që ai kishte shpallur vetëm disa orë më parë për të nesërmen pa dhënë shpjegime të mëtejshme.
- Qeveria britanike ka vendosur sanksione ndaj 65 individëve dhe kompanive të tjera në përgjigje të pushtimit rus të Ukrainës.
- Presidenti ukrainas Volodymyr Zelensky u bëri thirrje vendeve prodhuese të energjisë të shtunën të rrisin prodhimin në mënyrë që Rusia të mos përdorë pasurinë e saj të naftës dhe gazit për të "shantazhuar" kombet e tjera.