Të dashur lexues, përshëndetje!
Në këtë blog ju ftojmë të përcillni zhvillimet në Ukrainë, me lajme në kohë reale. Qëndroni me Radion Evropa e Lirë.
Ministri i Jashtëm ukrainas: Rusia ka nisur pushtimin
Ministri i Jashtëm i Ukrainës, Dmytro Kuleba, tha se Rusia ka nisur pushtimin e vendit të tij.
Në një postim në Twitter, Kuleba shkroi se presidenti rus, Vladimir Putin, ka nisur “pushtimin e Ukrainës në shkallë të plotë”.
Ai tha se Ukraina do ta mbrojë veten dhe se "bota mund dhe duhet ta ndalë Putinin".
"Qytetet paqësore të Ukrainës janë nën sulm. Kjo është një luftë agresioni", tha Kuleba.
Zelenskyi shpall gjendje lufte
Presidenti i Ukrainës, Volodymyr Zelenskyi, tha se Rusia ka kryer sulme me raketa në infrastrukturën e Ukrainës dhe mbi rojet kufitare.
Përmes një postimi në Twitter, ai tha se ka biseduar me aleatët perëndimorë dhe se u ka bërë thirrje atyre që ta ndihmojnë Ukrainën me mbrojtje dhe financa.
Zelenskyi tha se ka shpallur gjendje lufte, por u bëri thirrje qytetarëve që të jenë të qetë.
