Zyrtari perëndimor: Një kolonel rus u vra nga ushtarët e tij
Dy komandantë të lartë rusë janë vrarë. Njëri prej tyre duket se ka vdekur pasi është sulmuar nga njerëzit e tij, tha një zyrtar perëndimor.
Oficeri komandues i Brigadës 37 të Pushkës Motorike, me gradë koloneli, u godit qëllimisht nga trupat e tij si rezultat i humbjeve të mëdha të brigadës së tij, tha zyrtari.
“Kjo thjesht jep një pasqyrë të disa prej sfidave morale që kanë forcat ruse”, tha zyrtari.
Megjithatë, disa raportimeve të tjera sugjerojnë se një kolonel, i quajtur Yuri Medvedev, ka pësuar lëndime në këmbë dhe është evakuuar për në Bjellorusi.
Po ashtu gjenerali i shtatë rus është vrarë. Ai raportohet se ishte komandant i Brigadës së 49-të të ushtrisë. Kremlini nuk ka komentuar ende për këto raportime, shkruan BBC.
Ukraina thotë se bisedimet me Rusinë janë “shumë të vështira”
Ukraina tha më 25 mars se bisedimet me Moskën janë “shumë të vështira” dhe u zotua se nuk do të tërhiqet nga kërkesat e saj.
“Procesi negociues është shumë i vështirë”, tha ministri i Jashtëm ukrainas, Dmytro Kuleba.
“Delegacioni ukrainas ka një qëndrim të fortë dhe nuk heq dorë nga kërkesat e tij. Ne insistojmë, para së gjithash, për një armëpushim, garanci të sigurisë dhe integritetin territorial të Ukrainës”, shtoi ai.
Ai po ashtu tha se “nuk ka konsensus” në çështjet kyçe me Rusinë, që ka nisur pushtimin e paprovokuar të Ukrainës më 24 shkurt.
“Në veçanti, gjuha ukrainase është dhe do të jetë gjuha e vetme zyrtare në Ukrainë”, tha ai.
Lajmin e plotë mund ta lexoni KËTU
Biden takon ushtarët amerikanë në Poloni
Presidenti amerikan, Joe Biden, ka vizituar trupat amerikane që gjenden në qytetin polak pranë kufirit me Ukrainën, teksa Moska ka sinjalizuar se do të përqendrojë luftën në lindje të Ukrainës.
Biden u takua me dhjetëra ushtarë gjatë një vizite të realizuar më 25 mars në Rzeszow, që gjendet më pak 160 kilometra larg bazës ushtarake në perëndim të Ukrainës, që u sulmua nga Rusia më 13 mars.
Mijëra trupa amerikane janë të stacionuara në Poloni si pjesë e batalioneve të NATO-s. Ky shtet po ashtu ka strehuar mbi 2 milionë refugjatë ukrainas që prej se Rusia nisi pushtimin e paprovokuar të Ukrainës më 24 shkurt.
Lajmin e plotë mund ta lexoni KËTU
Hungaria refuzon kërkesën e Zelenskyt
Kryeministri i Hungarisë, Viktor Orban, ka refuzuar thirrjet e presidentit ukrainas, Volodymyr Zelensky, për armë dhe sanksione më të ashpra kundër Rusisë. Orban ka argumentuar se diçka e tillë do të ishte “kundër interesave të Hungarisë”.
Orban “refuzoi kërkesat [e Zelenskyt] të bëra në Këshillin Evropian sepse ato janë në kundërshtim me interesat e Hungarisë”, tha zëdhënësi i Qeverisë hungareze, Zoltan Kovacs.
“Hungaria dëshiron që të qëndrojë jashtë kësaj lufte, prandaj ne nuk do të lejojmë transferimin e armëve në Ukrainë”, tha ai përmes një deklarate për media.
