Shefi i NATO-s njofton për dislokime të reja në Evropën Lindore
Liderët e NATO-s pritet të pajtohen që të dislokojnë trupa të reja për aleatët lindor dhe për më shumë mbështetje ndaj Ukrainës në përgjigje ndaj luftës së Rusisë ndaj shtetit fqinj, tha të mërkurën shefi i NATO-s, Jens Stoltenberg.
Liderët e aleancës ushtarake, që udhëhiqet nga Shtetet e Bashkuara, do të takohen të enjten në Bruksel në një samit urgjent, teksa Perëndimi po ballafaqohet me krizën më të madhe të sigurisë në dekada.
Stoltenberg tha se aleatët do të nënshkruajnë dërgimin e gatër “grupeve luftarake” në anëtarët lindorë: Bullgari, Hungani, Rumani dhe Sllovaki. Dislokimi i këtyre trupave është pjesë e përpjekjeve që kanë nisur më herët, duke vendosur mijëra trupa më afër Rusisë.
“Pres që liderët të pajtohen për forcimin e qëndrimit të NATO-s në të gjitha fushat, me rritjen e forcave në pjesën lindore të aleancës në tokë, ajër dhe det”, tha ai.
Putin dëshiron që vendet “jomiqësore” të paguajnë gazin me rubla
Presidenti i Rusisë, Vladimir Putin, ka njoftuar, më 23 mars, se shteti i tij do të kërkojë që vendet “jomiqësore” të paguajnë për eksportet e gazit natyror rus vetëm me rubla, prej tash e tutje.
Putin ka thënë, gjatë një takimi me zyrtarë qeveritarë, se “një numër vendesh perëndimore kanë marrë vendime të kundërligjshme për të ashtuquajturën ngrirje të pasurive ruse, duke kufizuar praktikisht besueshmërinë e valutave të tyre, duke minuar besimin për këto valuta”.
“Nuk ka kurrfarë kuptimi”, ka shtuar Putin, “që t’i furnizojmë Bashkimin Evropian dhe Shtetet e Bashkuara me mallrat tona, dhe të paguhemi me dollarë, euro, e një numër valutash tjera”.
Si rezultat i kësaj, ai ka thënë se ka vendosur të marrë “masa” për të ndryshuar pagesat për “gazin tonë natyror, të ofruar për vendet e ashtuquajtura jomiqësore”, me rubla ruse.
Presidenti rus nuk ka thënë se kur saktësisht do të hyjë në fuqi kjo politikë e re. Ai ka udhëzuar bankën qendrore të vendit të tij që të përcaktojë procedurat, sipas të cilave blerësit e gazit natyror do të mund të merrnin rubla në Rusi.
Imazhet satelitore tregojnë shkatërrimet në Mariupol
Imazhet satelitore të marra nga Maxar Technologies, më 22 mars, shfaqin ndërtesa duke u djegur ose të shkatërruara nga bombardimet ruse në qytetin port të Mariupolit, si dhe përmbytjet në veri të kryeqytetit, Kiev.
Imazhet satelitore tregojnë shkatërrimet në Mariupol
Kreu i NATO-s i thotë Rusisë se nuk mund ta fitojë një luftë bërthamore
NATO paralajmëroi të mërkurën se lufta e Rusisë në Ukrainë, mund të rrëshqasë në një konfrontim bërthamor midis Moskës dhe Perëndimit.
“Rusia duhet të ndalojë këtë retorikë të rrezikshme të papërgjegjshme bërthamore”, tha Sekretari i Përgjithshëm i NATO-s, Jens Stoltenberg në një konferencë shtypi.
"Por, le të mos ketë dyshim për gatishmërinë tonë për të mbrojtur dhe mbrojtur aleatët kundër çdo kërcënimi në çdo kohë", tha ai.
"Rusia duhet të kuptojë se ajo kurrë nuk mund të fitojë një luftë bërthamore," tha ai në prag të një samiti të liderëve kombëtarë të aleancës ushtarake perëndimore në Bruksel.
Stoltenberg megjithatë ritheksoi se “NATO nuk është pjesë e konfliktit”.
