Stoltenberg: Bjellorusia ende po mundëson pushtimin rus të Ukrainës
Bjellorusia ka qenë "bashkëpunëtore" në pushtimin rus të Ukrainës edhe para fillimit të tij, duke lejuar që territori i saj të përdoret për grumbullimin e trupave dhe ajo vazhdon të mundësojë pushtimin, tha Sekretari i Përgjithshëm i NATO-s, Jens Stoltenberg, më 23 mars.
Ai tha në një konferencë shtypi në prag të një samiti të NATO-s në Bruksel se Bjellorusia ka lejuar gjithashtu që fushat e saj ajrore ushtarake të përdoren nga forcat ruse për të nisur sulmet ndaj qyteteve dhe civilëve ukrainas.
NATO i ofron mbështetje Ukrainës përballë kërcënimeve bërthamore dhe kimike
Udhëheqësit e NATO-s janë të vendosur të bien dakord për mbështetje shtesë për Ukrainën për t'u marrë me kërcënimet kimike dhe bërthamore ndërsa lufton me forcat pushtuese ruse, tha të mërkurën shefi i aleancës, Jens Stoltenberg.
“Nesër, pres që aleatët të bien dakord të ofrojnë mbështetje shtesë, duke përfshirë ndihmën e sigurisë kibernetike, si dhe pajisje për të ndihmuar Ukrainën të mbrohet nga kërcënimet kimike, biologjike, radiologjike dhe bërthamore”, tha Stoltenberg përpara një samiti urgjent të NATO-s në Bruksel të enjten.
Moska thotë se ka bërë dy shkëmbime të burgosurish me Ukrainën
Ministria e Jashtme e Rusisë tha të mërkurën se dy shkëmbime të burgosurish kanë ndodhur që kur pushtimi në Ukrainë filloi muajin e kaluar.
Ajo nuk ka dhënë detaje mbi numrin e të burgosurve të shkëmbyer.
Të hënën, Avokati i Popullit i Rusisë për të drejtat e njeriut, Tatiana Moskalkova tha se nëntë të burgosur rusë u shkëmbyen për kryebashkiakun e Melitopolit, një qytet në Ukrainën juglindore të kapur nga ushtria ruse.
Kosova vendos sanksione të reja ndaj Rusisë
Qeveria e Kosovës ka miratuar një vendim për zgjerimin e pakos së sanksioneve kundër Rusisë për shkak të pushtimit të Ukrainës.
Ky vendim synon që Kosova t’i përshtatet pakos ekzistuese të sanksioneve të ndërmarra nga Bashkimi Evropian ndaj Rusisë dhe Bjellorusisë.
Përveç sanksioneve, në mbledhjen e Qeverisë së Kosovës u mor vendim që të ndahen 100 mijë euro për dërgimin e një kontigjenti me ndihma humanitare drejt Ukrainës.
