Pushtimi rus i Ukrainës

24 shkurt 2022

Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, e ka cilësuar si "operacion special". Perëndimi e ka dënuar ashpër pushtimin dhe ka vendosur një varg sanksionesh të rënda kundër Rusisë.

Presidenti i Rusisë, Vladimir Putin, urdhëroi një “operacion ushtarak” në Ukrainë, në orën 5:55 të mëngjesit të 24 shkurtit, 2022. Disa minuta më vonë pasuan granatimet e para.
Presidenti i Ukrainës, Volodymyr Zelensky, shpalli gjendje lufte në vend.
Shtetet e Bashkuara, Bashkimi Evropian dhe NATO-ja e dënuan sulmin dhe u zotuan se do ta mbajnë Rusinë përgjegjëse.
Më 21 shkurt, presidenti rus, Vladimir Putin, ka marrë vendim për njohjen e rajoneve separatiste të Ukrainës, Donjeck dhe Luhansk, si shtete të pavarura, dhe ka urdhëruar vendosjen e forcave ruse në ato territore. Perëndimi e ka dënuar fuqishëm këtë veprim, duke e cilësuar si uvertyrë për pushtim të plotë.
Rusia ka grumbulluar më shumë se 150,000 forca të armatosura dhe pajisje të rënda ushtarake në kufijtë me Ukrainën - gjë të cilën NATO-ja e ka përshkruar si grumbullimin më të madh ushtarak në kontinentin evropian që nga fundi i Luftës së Ftohtë.
Udhëheqësi rus po përpiqet të parandalojë anëtarësimin e Ukrainës në NATO - gjë të cilën e ka cilësuar si kërcënim ekzistencial - dhe të ndalojë zgjerimin e aleancës perëndimore drejt lindjes.

18:56 18.3.2022

Negociatori ukrainas thotë se nuk kanë ndryshuar qëndrim

Anëtari i ekipit negociator të Ukrainës, Mykhailo Podolyak thotë se Rusia po përpiqet të "provokojë tension në media" dhe se pozicioni i Ukrainës mbetet i pandryshuar.

Më herët, delegacioni rus tha se ka përparim në negociata sa i takon demilitarizimit të Ukrainës.

“Statusi i negociatave. Deklaratat e palës ruse janë vetëm qëndrime që ata i kërkojnë. Të gjitha deklaratat synojnë, ndër të tjera, të provokojnë tensione në media. Qëndrimet tona janë të pandryshuara. Armëpushimi, tërheqja e trupave dhe garanci të forta sigurie me formula konkrete”, ka thënë Podolyak.

18:49 18.3.2022

Rusia thotë se negociatat po përparojnë, Ukraina e mohon

Moska dhe Kievi janë "në gjysmë të rrugës" për të rënë dakord për çështjen e çmilitarizimit të Ukrainës dhe pikëpamjet e tyre janë më të lidhura me neutralitetin e Ukrainës dhe heqjen dorë nga bashkimi me NATO-n, thotë negociatori rus Vladimir Medinsky.

Agjencia ruse e lajmeve Interfax citon Medinsky të ketë thënë se ekipet negociuese kanë diskutuar garancitë e sigurisë nëse Ukraina nuk përpiqet më të bashkohet me aleancën ushtarake perëndimore NATO. Kjo është mohuar nga delegacioni ukrainas. Përmes një reagimi delegacioni ukrainas ka thënë se “qëndrimi i tyre është i pandryshueshëm”.

Fotografi nga takimet paraprake në mes të delegacioneve ukrainas dhe rus.

17:20 18.3.2022

Përkujtohen fëmijët e vrarë në Ukrainë

Derisa Ukraina mban zi për të vdekurit e saj nga luftimet, shumë karroca fëmijësh boshe u rreshtuan në sheshin qendror me kalldrëm të qytetit të Lviv të premten më 18 mars. Ky aksion u organizua nga aktivistët e qytetit në shenjë kujtimi të fëmijëve të vrarë në Ukrainë si pasojë e pushtimit rus.

Karrocet boshe të vendosura në qytetin Lviv.

Bashkia e Lviv vendosi 109 karroca, çdonjëra në kujtim të një fëmije të vrarë që nga fillimi i luftës.

Lviv që ndodhet në perëndim të Ukrainës ka tërhequr qindra mijëra ukrainas që kërkojnë strehim larg vijës së parë të luftës.

16:36 18.3.2022

Rusia zotohet të sulmojë dërgesat e armatimit që hyjnë në Ukrainë

Një dërgesë me armatim që ju dërgua Ukrainës.

Ministri i Jashtëm i Rusisë, Sergej Lavrov, ka thënë të premten se Rusia do të sulmojë çdo dërgesë armësh që hyn në Ukrainë, raportojnë mediat ruse.

"Ne e kemi bërë shumë të qartë se çdo ngarkesë që do të hyjë në territorin e Ukrainës, të cilën ne do ta konsiderojmë [se po bartë] armë, do të bëhet një objektiv legjitim,” raportohet të ketë thënë Lavrov.

Një numër vendesh të NATO-s kanë premtuar ndihmë ushtarake për Ukrainën, duke filluar nga dronët deri te raketat antitank.

Shfaq më shumë