Pushtimi rus i Ukrainës

24 shkurt 2022

Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, e ka cilësuar si "operacion special". Perëndimi e ka dënuar ashpër pushtimin dhe ka vendosur një varg sanksionesh të rënda kundër Rusisë.

Presidenti i Rusisë, Vladimir Putin, urdhëroi një “operacion ushtarak” në Ukrainë, në orën 5:55 të mëngjesit të 24 shkurtit, 2022. Disa minuta më vonë pasuan granatimet e para.
Presidenti i Ukrainës, Volodymyr Zelensky, shpalli gjendje lufte në vend.
Shtetet e Bashkuara, Bashkimi Evropian dhe NATO-ja e dënuan sulmin dhe u zotuan se do ta mbajnë Rusinë përgjegjëse.
Më 21 shkurt, presidenti rus, Vladimir Putin, ka marrë vendim për njohjen e rajoneve separatiste të Ukrainës, Donjeck dhe Luhansk, si shtete të pavarura, dhe ka urdhëruar vendosjen e forcave ruse në ato territore. Perëndimi e ka dënuar fuqishëm këtë veprim, duke e cilësuar si uvertyrë për pushtim të plotë.
Rusia ka grumbulluar më shumë se 150,000 forca të armatosura dhe pajisje të rënda ushtarake në kufijtë me Ukrainën - gjë të cilën NATO-ja e ka përshkruar si grumbullimin më të madh ushtarak në kontinentin evropian që nga fundi i Luftës së Ftohtë.
Udhëheqësi rus po përpiqet të parandalojë anëtarësimin e Ukrainës në NATO - gjë të cilën e ka cilësuar si kërcënim ekzistencial - dhe të ndalojë zgjerimin e aleancës perëndimore drejt lindjes.

16:25 18.3.2022

OKB: Të paktën 816 civilë janë vrarë në Ukrainë që nga fillimi i konfliktit

Zyra e Kombeve të Bashkuara tha të premten se të paktën 816 civilë janë vrarë dhe 1,333 janë plagosur në Ukrainë që nga fillimi i luftimeve e deri më 17 mars.

Shumica e viktimave u vranë nga armët shpërthyese si granatimet e artilerisë së rëndë dhe sistemet e shumta të raketave, si dhe nga sulmet raketore dhe ajrore, tha OKB.

Numri aktual i vdekjeve mendohet të jetë më i lartë pasi OKB-ja ende nuk është në gjendje të verifikojë raportet e viktimave nga qytetet e goditura rëndë nga si Mariupol.

Lexoni edhe këtë:

Trupat ruse shihen teksa banorët e Heniçeskut në rajonin Herson protestojnë kundër pushtimit rus. 6 mars 2022.

SHIKONI EDHE:

Zhdukja e banorëve ukrainas në rajonin e kontrolluar nga Rusia

16:19 18.3.2022

Mbi 130 të shpëtuar nga rrënojat e teatrit në Mriupol

Teatri i bombarduar nga forcat ruse në Mariupol.

Presidenti i Ukrainës, Volodymyr Zelensky tha se është duke vazhduar shpëtimi i njerëzve nga rrënojat e teatrit të bombarduar në Mariupol nga forcat ruse. Ai tha se deri më tani janë gjetur 130 të mbijetuar.

Në një adresim në internet, Zelensky tha se bombardimet nga forcat ruse vazhduan të pengonin autoritetet që të krijonin korridore efektive humanitare në Mariupol.

"Më shumë se 130 njerëz janë shpëtuar. Por qindra banorë të Mariupolit janë ende nën rrënoja," tha Zelenski në një adresim në profilin e tij në rrjetin social Facebook.

Ai premtoi gjithashtu se operacionet e shpëtimit në Mariupol do të vazhdojnë pavarësisht granatimeve.

16:01 18.3.2022

Në tetë vjetorin e aneksimit të Krimesë, Putin lavdëron aksionin për pushtim të Ukrainës

Të premten, në një paraqitje të rrallë publike, presidenti i Rusisë Vladimir Putin u shfaq në një skenë para dhjetëra-mijëra rusëve për të festuar tetë vjetorin e aneksimit të Krimesë nga Ukraina.

Në ngjarjen që u zhvillua në stadiumin e qytetit të Moskës, para dhjetëra-mijëra rusëve Putin, lavdëroi aksionin ushtarak për pushtimin e Ukrainës.

“Krah për krah, ata ndihmojnë dhe mbështesin njëri-tjetrin”, tha Putin para masës.

Presidenti rus, Vladimir Putin duke mbajtur fjalimin në Stadiumin Luzhniki.

SHIKONI EDHE:

Televizioni shtetëror rus ndërpret fjalimin e Putinit

15:31 18.3.2022

Biden dhe Xi kundërshtojnë ngjarjet në Ukrainë

Presidenti amerikan, Joe Biden ka zhvilluar një bisedë përmes videolidhjes me presidentin kinez, Xi Jinping. Mediat raportojnë se presidenti kinez Xi, ka thënë se lufta që po ndodh në Ukrainë nuk është në interes të askujt.

“Kriza në Ukrainë është diçka që ne nuk duam ta shohim”, citohet të ketë thënë Xi, raporton Reuters.

Shfaq më shumë