Australia dhe Japonia prezantojnë sanksione të reja
Australia dhe Japonia kanë shtuar sanksionet ndaj Moskës.
Kanberra ka shtuar miliarderët rusë, Oleg Deripaska dhe Viktor Vekselberg, si dhe 11 banka dhe subjekte qeveritare në listën e saj të sanksioneve.
“Me përfshirjen e Bankës Qendrore të Rusisë, Australia tani ka shënjestruar të gjitha subjektet e mundshme të Qeverisë ruse, të cilat janë përgjegjëse për menaxhimin e borxhit sovran të Rusisë”, ka thënë ministrja e Jashtme kanadeze, Marise Payne përmes një deklarate.
Ndërkohë Tokio ka sanksionuar 15 rusë tjerë dhe nëntë organizata, duke përfshirë kompaninë shtetërore të eksportimit të armëve, Rosoboronexport.
Çfarë dimë për situatën në Lviv?
Pak më parë është raportuar se një ndërtesë afër aeroportit të Lvivit është goditur me raketë.
Lvivi është 70 kilometra larg kufirit me Poloninë dhe kryesisht larg prej betejës që po zhvillohet në lindje dhe jug të Ukrainës.
Në këtë zonë nuk është raportuar për bombardime deri pesë ditë më parë, kur një sulm ka goditur qendrën për stërvitje ushtarake në Javoriv, 30 kilometra larg Lvivit.
Ky qytet është konsideruar deri më tani “strehë e sigurt”, pasi shumë ukrainas nga qytetet e bombarduara janë nisur drejt tij.
Disa media kanë raportuar se ky mund të jetë tentim i forcave ruse “për të ndalur furnizimet me armë në këtë shtet”, pasi ato kryesisht hyjnë në Ukrainë përmes Polonisë.
Kanë vazhduar evakuimet nga rajoni i Kievit
Shërbimet shtetërore të emergjencës në Ukrainë kanë thënë se edhe gjatë natës kanë vazhduar evakuimet nga rajoni i Lvivit.
Më shumë se 1,000 ukrainas janë larguar deri në mesnatë me autobusë dhe makina, kanë thënë zyrtarët ukrainas.
Sipas tyre, të evakuuarit tani janë në një “vend të sigurt”.
Në Sumi mund të hapen korridoret humanitare
Kryetari i rajonit të Sumit – në verilindje të Ukrainës – ka thënë se të premten mund të hapen korridoret humanitare në këtë shtet.
Autobusët mund të dërgohen në qytet për t’iu ndihmuar njerëzve që të largohen nëpër gjashtë rrugë të ndryshme.
Sumi, qytet afër kufirit me Rusinë, është përballur në javët e fundit me bombardime të ashpra, dhe mungesë të ujit e rrymës.