Biden do të bisedojë me homologun kinez për çështjen e furnizimit të Rusisë me armë
Mundësia që Kina ta furnizojë me pajisje ushtarake Rusinë – të cilat mund të përdoren nga presidenti rus, Vladimir Putin kundër Ukrainës - po shihet si “shqetësim i madh” për shtetet e Bashkuara të Amerikës.
Zëdhënësja e Shtëpisë së Bardhë, Jen Psaki, tha se dështimi i Kinës për të denoncuar veprimet e Rusisë “flet shumë”.
Ajo tha se presidenti, Joe Biden, do ta diskutojë këtë temë me homologun e tij kinez, Xi Jinping, në një telefonatë e planifikuar të realizohet të premten.
Të hënën, SHBA paralajmëroi aleatët se Kina kishte sugjeruar se është e hapur për të ofruar mbështetje ushtarake dhe ekonomike për Rusinë.
Ministria e Jashtme kineze akuzoi SHBA-në për përhapjen e dezinformatave dhe Rusia mohoi se i ka kërkuar ndihmë ushtarake Pekinit.
Raportohet se rreth 30,000 njerëz janë larguar nga Mariupoli
Autoritetet në Mariupol thonë se rreth 30,000 njerëz janë larguar nga qyteti që nga fillimi i luftës më 24 shkurt.
Siç raporton Reuters, autoritetet lokale vlerësojnë se më shumë se 350,000 njerëz janë ende të strehuar në qytet.
Qyteti është i rrethuar nga forcat ruse dhe është përballur me bombardimet më të ashpra të konfliktit.
Reuters raporton për radhë të gjata veturash që shkojnë në veri nga Mariupoli, disa prej të cilabe kanë vendosur në xhamin e përparmë fjalën “fëmijë”të shkruar në rusisht.
Zyrtarët ukrainas thonë se banorët kanë mbetur të bllokuar në qytet nga bombardimet ruse pa ngrohje, pa energji elektrike dhe pa ujë.
Blinken: Një shtetas amerikan u vra në Ukrainë
Sekretari amerikan i Shtetit, Antony Blinken, tha të enjten se një shtetas amerikan u vra në Ukrainë në mes të pushtimit të vazhdueshëm rus.
“Unë mund të konfirmoj se një shtetas amerikan është vrarë. Nuk kam më shumë detaje”, u tha Blinken gazetarëve në një konferencë për shtyp.
Blinken tha se pajtohet me presidentin, Joe Biden, se në Ukrainë janë kryer krime lufte.
Ai tha se ekspertët amerikanë janë në proces të dokumentimit dhe vlerësimit të krimeve të mundshme të luftës të kryera në Ukrainë.
Ministri i Jashtëm i Lituanisë, Gabrielius Landsbergis, tha se udhëtimi që ai bëri në një pjesë “të sigurt” të Ukrainës më 15 mars ishte “bizar”, teksa jeta normale vazhdonte derisa u dëgjuan sirenat. Duke folur për gazetarin e REL-it, Ray Furlong më 17 mars, ai tha se “Putini duhet të mposhtet në Ukrainë”, që sipas tij do të rezultonte me “fundin e putinizmit”.
