Rusia ia zgjat paraburgimin basketbollistes amerikane
Basketbollistes amerikane, Brittney Griner, i është zgjatur paraburgimi edhe për dy muaj, njofton agjencia e lajmeve Reuters.
Sipas raportimeve, një gjykatë në rajonin e Moskës vendosi që Griner të qëndrojë në paraburgim deri më 19 maj.
33-vjeçarja besohet se është arrestuar nga autoritetet ruse një muaj më parë në një aeroport të Moskës, për akuza në lidhje me drogën.
Sekretari amerikan i Shtetit, Antony Blinken, tha javën e kaluar se zyrtarët amerikanë “po bëjnë gjithçka që munden” për ta ndihmuar atë.
Rreth 90 për qind e Mariupolit është shkatërruar
Autoritetet në Mariupol thanë se deri në 90 për qind e ndërtesave në qytet janë shkatërruar nga bombardimet e përditshme të qytetit nga forcat ruse.
Lesia Vasylenko, deputete ukrainase, shkroi në Twitter se qyteti po “shkatërrohet nga qielli” dhe përsëriti thirrjen e presidentit ukrainas, Volodymyr Zelensky, drejtuar vendeve perëndimore për të vendosur një zonë të ndalim-fluturimit.
Ekipet e shpëtimit në qytet po përpiqen të nxjerrin të mbijetuarit pas sulmit të teatrit në Mariupol ku rreth 1000 njerëz - kryesisht gra dhe fëmijë - ishin fshehur.
Përpjekja e shpëtimit po vazhdon mes bombardimeve të forta nga forcat ruse në periferi të qytetit.
"Fundërrina dhe tradhtarë" - Putin kërcënon rusët që kundërshtojnë luftën në Ukrainë
Vladimir Putin ka bërë thirrje që në Rusi të bëhet një “spastrim natyral” i “fundërrinave dhe tradhtarëve”, që kritikojnë pushtimin e Ukrainës, të urdhëruar prej tij. Nëpërmjet një adresimi televiziv, më 16 mars, presidenti rus po ashtu e ka akuzuar Perëndimin se po përpiqet ta përçarë shoqërinë ruse, dhe të nxisë një konfrontim civil në Rusi.
Ministri ukrainas: Të gjithë ta quani Putinin kriminel lufte
Presidenti i Shteteve të Bashkuara, Joe Biden, për herë të parë e ka quajtur “kriminel lufte” presidentin e Rusisë, Vladimir Putin.
Tani, ministri ukrainas i Mbrojtjes, Oleksiy Reznikov, u ka kërkuar liderëve evropianë të bëjnë të njëjtën gjë.
“U bëj thirrje të gjithë anëtarëve të Parlamentit Evropian që të pranojnë se Putin është një kriminel lufte, siç ka bërë presidenti amerikan”, tha ai.
Komentet e tij vijnë pasi Sekretarja e Jashtme e Mbretërisë së Bashkuar, Liz Truss, tha gjithashtu se ka “prova shumë të forta” se Putini është një “kriminel lufte”.
